პრაიმ სპორტი ახალგაზრდა, ნიჭიერი ქართველი ფეხბურთელების შესახებ თითქმის ყოველკვირეულად გიამბობთ. ამჯერად უკრაინული „კრივბასის“ წევრის, ზურაბ გიგაშვილის შესახებ მოგიყვებით.
19 წლის ფეხბურთელის კლუბი უკრაინის პირველ ლიგაში თამაშობს. გიგაშვილი „კრივბასს“ სეზონის დასაწყისში შეუერთდა. მცირე ასაკის მიუხედავად, ზურაბს დიდი გამოცდილება დაუგროვდა. სხვადასხვა წლების განმავლობაში ის თურქეთში, „ანკარაგუჯუს“ შემადგენლობაში გამოდიოდა, უკრაინაში გადასვლამდე კი რუსეთის პრემიერ ლიგაში „ტამბოვის“ ღირსებას იცავდა. ზურა საკმაოდ ბევრს ვარჯიშობს, რომ „კრივბასის“ ძირითად შემადგენლობაში ადგილი დაიმკვიდროს, ახალგაზრდა მცველის ოცნება პრემიერ ლიგაში თამაშია.
გთავაზობთ ინტერვიუს ახალგაზრდა ფეხბურთელთან:
– როგორ შეაფასებდი შენს ტრანსფერს „კრივბასში“?
– ძალიან ბედნიერი ვარ კრივბასში შემდგარი ტრანსფერით ამ გუნდს ძალიან დიდი მიზნები და გეგმები აქვს მეც მინდა ამ გუნდს ამ ყველაფერში დავეხმარო.
– ტრანსფერის დეტალებზე რომ გვესაუბრო.
– ყველაფერი ძალიან მალე განვითარდა, როცა გუნდის მიზნები და პროექტი მოვისმინე გადაწყვეტილების მიღება ძნელი არ ყოფილა.
– სხვა შემოთავაზებები თუ გქონდა და რატომ გადაწყვიტე „კრივბასში“ გადასვლა?
– რა თქმა უნდა, ძალიან ბევრი ვარიანტი იყო კრივბასამდე, ასევე ბევრი ბოლო წუთზე ჩაშლილი ტრასფერი. იყო მოლაპარაკებები რუსული, თურქული, ყაზახური და კვიპროსული გუნდებიდან, მაგრამ საბოლოო ჯამში „კრივბასში“ გადასვლა გადავწყვიტე.
– როგორ დაახასიათებდი შენს კლუბს?
– „კრივბასს“ უნდა დაბრუნება ისევ იქ სადაც იყო, ძალიან კარგი პროექტია და ძალიან დიდი გეგმები აქვს. დარწმუნებული ვარ, მომავალ წელს უმაღლეს ლიგაში ვიასპარეზებთ. ძალიან ბედნიერი ვარ, რომ ამ პროექტის ნაწილი ვარ.
– უკრაინაში გადმოსვლის შემდეგ დებიუტი ჯერჯერობით არ გქონია, როდის უნდა ველოდოთ თქვენს სადებიუტო მატჩს?
– შეკრება არ გამივლია გუნდთან ერთად, დიდხანს მომიწია პაუზის აღება, ახლა დავიწყე აქტიურად ვარჯიში და ნელ-ნელა ფორმაშიც შევდივარ. ყველაფერს ვაკეთებ იმისთვის, რომ ძირითად შემადგენლობაში ადგილი რაც შეიძლება მალე დავიმკვიდრო. თავდაუზოგავი შრომა ამას ძალიან მალე მოიტანს.
– მთავარ მწვრთნელთან როგორი ურთიერთობა გაქვს?
– მწვრთნელი თვითონაც ცენტრალური მცველი იყო და ძალიან ბევრი რამ შემილია ვისწავლო მისგან. რაც შეეხება ურთიერთობას, ჯერჯერობით ყველაფერი კარგად მიდის.
– ასაკობრივ ნაკრებებში თუ გითამაშია?
– კი, 21-წლამდე ნაკრებში მითამაშია. დებიუტი ბელარუსის ნაკრების წინააღმდეგ შედგა.
– შენ პირველ კლუბზე რომ გვესაუბრო?
– ჩემი პირველი გუნდი „ჩაიუოლუსპორია“. ამ გუნდთან ძალიან კარგი მოგონებები მაკავშირებს და სულ მადლობელი ვიქნები, ჩემს გულში ამ კლუბს ძალიან დიდი ადგილი უკავია.
– რა გაძლევს მოტივაციას?
– ყველაზე დიდი მოტივაცია რა თქმა უნდა ოჯახია, არის მომენტები, როცა ოჯახთან ერთად ყოფნა ძალიან მენატრება, მაგრამ ცხოვრებაში ყოველთვის არის რთული პერიოდი… ისე რამის მიღწევა ძალიან რთულია.
– რა არის შენი მიზანი და ოცნება?
– ოცნება და მიზანი ინგლისის პრემიერ ლიგაში თამაშია, ბავშობიდან ამ ოცნებისთვის ვშრომობ. ასევე, ძალიან მინდა საქართველოს ნაკრებში თამაში. დიდი იმედი მაქვს, რომ ღმერთის წყალობით ამ მიზნებს მივაღწევ.
