სასიხარულო ამბავი მოვიდა ავსტრიიდან. ოთარ კიტეიშვილი სრული დატვირთვით ვარჯიშობს და არ არის გამორიცხული უკვე მომდევნო ტურში გრაცის „შტურმის“ შემადგენლობაში მოედანზეც გამოჩნდეს. ამის შესახებ ინფორმაციას თავად ავსტრიული გუნდის მთავარი მწვრთნელი კრისტიან ილცერი ავრცელებს.
„ოთარი მთელი კვირაა უკვე გუნდთან ერთად არის და რაც მთავარია სრულად იტვირთება. ძალიან სასიხარულოა, რომ კიტეიშვილის გარდა გამოჯანრმთელების გზაზეა გრეგორი ვიუტრიხიც. ორივე ფეხბურთელი ჩვენი გუნდისთვის ძალზედ მნიშვნელოვანნი არიან. საბოლოო გადაწყვეტილება ჯერ არ მიმიღია, მაგრამ არ გამოვრიცხავ, რომ მომდევნო მატჩში ისინი ძირითად შემადგენლობაში დავაყენო“ – ამბობს გრაცელთა მთავარი მწვრთნელი.
ოთარ კიტეიშვილი ავტრიის ბუნდესლიგის მე-18 ტურში დაშავდა და უკვე 3 კვირაა უქმობს. თავდაპირველი ვერსით ტრავმა უფრო საშიში ჩანდა და ვარაუდობდნენ, რომ ქართველ ფეხბურთელს იმაზე მეტი გაუცდებოდა, ვიდრე ახლა, მაგრამ საბედნიეროდ სარეაბილიტაციო პროცესი სწრაფად და ხარისხიანად წარიმართა.
ოთარ კიტეიშვილი ეროვნული ნაკრების მწვრთნელმა ვილი სანიოლიმ მარტის მატჩებისთვისაც გამოიძახა და საჭიროების შემთხვევაში ქართველი ქომაგი მას მოედანზეც იხილავს. შეგახსენებთ, მსოფლიო ჩემპიონატის შესარჩევ ეტაპს ჯვაროსნები 25 მარტს სტოქჰოლმში შვედეთთან დაპირისპირებით იწყებენ.
