მადრიდის მასტერსი მსოფლიოს პირველი ჩოგნის გარეშე ჩაივლის. ნოვაკ ჯოკოვიჩმა, ახლახანს მშობლიურ ბელგრადში დასრულებულ 250-იანი კატეგორიის ტურნირზე ასლან კარაცევთან ნახევარფინალში მარცხის შემდეგ გადაწყვიტა საკუთარი გეგმისთვის გადაეხედა.
თავდაპირველი კალენდრით, რომელიც ნოლემ მიმდინარე სეზონისთვის შეადგინა ის მადრიდის მასტერსზე თამაშს აპირებდა, თუმცა როგორც ირკვევა გადაიფიქრა. სერბი ჩოგბურთელის სურვილია „როლან გაროსის“ მეიჯორს სრულ მზადყოფნაში შეხვდეს, ამიტომაც გადაწყვიტა ძალიან არ გადაიტვირთოს.
ჯოკოვიჩს მადრიდის მასტერსი კარიერაში სამჯერ აქვს მოგებული და ამჟამად მოქმედი ჩემპიონიც გახლავთ, თუმცა როგორც ავღნიშნეთ, წლეულს, ესპანეთის დედაქალაქში ტიტულის დაცვას აღარ შეეცდება.
ნოლეს არყოფნაში კი მადრიდის მასტერსზე, რომელიც 2-9 მაისს გაიმართება, პირველ ნომრად გრუნტის მეფე რაფაელ ნადალი იქნება განთესილი.
