„ყველაზე მეტად მსურს კვლავ დავტკბე მასთან ერთად თამაშით“ – ეს სიტყვები ნეიმარს ეკუთვნის, რომელიც მესის ეძღვნება.
ფეხბურთის ქომაგთ, ალბათ შეხსენება არ სჭირდება, რომ ბრაზილიელი ფორვარდი, არგენტინელ სუპერვარსკვლავთან ერთად, „ბარსელონაში“ 4 წელი გვერდიგვერდ თამაშობდა და მეტოქე გუნდებს დიდ თავსატეხს უჩენდნენ, ხოლო მესი-ნეიმარს დამატებული ლუის სუარესი კი მართლაც რომ ევროპაში ერთ-ერთ საუკეთესო შემტევ ტრიოს წარმოადგენდა.
„პსჟ“-ში გადაბარგებულ ნეიმარს კატალონიური კლუბისადმი ნოსტალგია დღემდე ამოძრავებს და როგორც ჩანს განსაკუთრებით მესი ენატრება. ამის დასტური ზემოთ მოყვანილი მისი სიტყვებია, ხოლო ჟურნალისტის კითხვაზე თუ რომელ კლუბში წარმოუდგენია კვლავ მესის თანაგუნდელობა ნეიმარი ორაზროვნად პასუხობს: „მას შეუძლია ჩემ პოზიციაზე ითამაშოს, ადგილს სიამოვნებით დავუთმობ. მომავალ წელს ეს აუცილებლად უნდა მოხდეს“.
შეგახსენებთ, ლიონელ მესის „ბარსელონასთან“ კონტრაქტი 2021 წლის 30 ივნისამდე აკავშირებს, ხოლო ნეიმარს ფრანგულ გრანდთან 2022 წლის ზაფხულამდე.
ვინ იცის, არ გამოვრიცხოთ, რომ ერთ მშვენიერ დღესაც საფეხბურთო სამყარომ მესი-ნეიმარის სუპერდუეტი კვლავ იხილოს.
