თამამად შეიძლება ითქვას, რომ რუსეთის ქალაქ ყაზანში დაწყებული გრანდ-სლემის პირველი საშეჯიბრო დღე ქართველი ძიუდოისტებისთვის წარმატებული გამოდგა. მიუხედავად იმისა, რომ ტურნირის დასკვნითი ნაწილი ჯერ კიდევ წინ არის, უკვე შეიძლება ითქვას, რომ საქართველოს ნაკრებს მინიმუმ ერთი მედალი გარანტირებული აქვს.
ლაშა გუჯეჯიანის შეგირდთაგან ტატამზე ლუხუმ ჩხვიმიანი (60კგ) და ბაგრატ ნინიაშვილი (66კგ) გავიდნენ, რომელთაგან ევროპისა და მსოფლიოს ჩემპიონმა ჩხვიმიანმა ფინალში ასპარეზობის უფლება მოიპოვა, ხოლო ნინიაშვილს საამისოდ სულ ცოტა დააკლდა.
ახალგაზრდა ქართველი ძიუდოისტი ნახევარფინალამდე ერთი ამოსუნთქვით მივიდა. ბაგრატ ნინიაშვილმა სერბი, მოლდოველი, საუდის არაბეთის წარმომადგენელი და რუსი მეტოქეები ბეჭებზე გააკრა და ნახევარფინალში დამსახურებულად გააღწია.
სამწუხაროდ, ფინალში გადასასვლელ დაპირისპირებაში ქართველი ძიუდოისტი რუსეთის კიდევ ერთ წარმომადგენელ მურად ჩოპანოვთან დამარცხდა და ბრინჯაოს მედლისთვის ყაზახ იესეტ კუანოვს დაეჭიდება.
