ბუნდესლიგის 21-ე ტური „ლაიპციგის“ „აუგსბურგთან“ გამარჯვებით (2:1) დაიწყო და მიუნხენის ბაიერნის შინაურ კედლებში „არმინიასთან“ ფრით (3:3) დასრულდა.
ერთი შეხედვით განსაკუთრებული ხომ არაფერი მოხმდარა? პრინციპში, რეკორდმაისტერის ბილეფილდელებთან ვერ მოგება მოულოდნელობად კი შეიძლება მივიჩნიოთ, მაგრამ ფეხბურთში ხომ ძლიერი სუსტს მუდამ ვერ ამარცხებს.
ისე, „ბაიერნს“ რომ ემარჯვა, მაშინ ამ მასალის დაწერა არც მოგვიხდებოდა, რადგან არც 22 წლის წინანდელი რეკორდი განმეორდებოდა.
საქმე იმაში გახლავთ, რომ გერმანიის ჩემპიონატში, ერთ ტურში 7 ფრე ბოლოს 1998/1999 წლების სეზონში დაფიქსირდა. მას შემდეგ მსგავს ფაქტს ადგილი აღარ ჰქონია, ვიდრე 2021 წლის 15 თებერვლამდე.
მეორე გუნდი, ვინც ბუნდესლიგის 21-ე ტურში „ლაიპციგთან“ ერთად იმარჯვა „აინტრახტი“ იყო, რომელმაც „კიოლნს“ 2:0 აჯობა, თორემ რომელიმე წყვილის დაზავების შემთხვევაში 22 წლის წინანდელი რეკორდი საერთოდ გაუმჯობესდებოდა.
