ჭადრაკი რომ ჩვენი თამაშია ეს არაერთხელ დამტკიცებულა და ამისთვის წარსულში მოგზაურობა სულაც არ არის საჭირო.
ძველი დიდება, რომელიც არაჩვეულებრივმა საჭადრაკო დედოფლებმა დაწერეს ქართული სპორტის ისტორიაში ოქროს ასოებით არის ჩაწერილი და მას ვერასოდეს ვერაფერი წაშლის. ტრადიციები კი გრძელდება და წარმატებითაც.
ნანა ძაგნიძე წლებია ქართული ჭადრაკის თვალსაჩინო წარმომადგენელია, რაზეც მისი აურაცხელი ტიტულებიც მეტყველებს. ის ქალთა ეროვნული ნაკრების შეუცვლელი წევრი და ჩვენი გუნდის არაერთი გამარჯვების შემოქმედია. ის არც ინდივიდუალურ შეჯიბრებებში ირცხვენს თავს.
ახლახანს, ნანა ძაგნიძემ, თავის მდიდარ კოლექციას კიდევ ერთი ჯილდო შემჰატა. ის კლუბებს შორის ევროპის ჩემპიონი გახდა და ამ გამარჯვებას ფრანგული „მონტე-კარლოს“ სახელით მიაღწია. ისე, აღნიშნული ჯილდო მისთვის უცხო არ გახლავთ. ნანა ძაგნიძეს ის უამრავჯერ აქვს მოგებული.
„პრაიმსპორტი“ ნანა ძაგნიძეს შეეხმიანა და მასთან მცირე ინტერვიუ ჩაწერა.
-მიუხედავად იმისა, რომ ეს ტიტული არაერთხელ მაქვს მოგებული, მაინც სასიამოვნო შეგრძნება იყო. რა თქმა უნდა, მნიშვნელოვანი ჯილდოა დ არც სხვა დროს ვიტყვი უარს აქ წარმატებაზე.
ევროპის ჩემპიონი წლების წინ ნანა ალექსანდრიას კლუბ „ნტნ“-ში თამაშის დროს, შემდეგ კი ნონა გაფრინდაშვილის გუნდში გავხდი. „მონტე-კარლოს“ შემადგენლობაშიც მომიგია ადრე. ვეღარც ვითვლი ეს თასი რამდენჯერ ავღმართე. არ გამოვრიცხავ ამ მხრივ რეკორდსმენიც ვიყო.
-„მონტე-კარლო“ როგორც თქვით თქვენთვის უცხო არ არის. რა იყო იქიდან შენი წამოსვლის მიზეზი და ახლა რატომ გადაწყვიტეთ დაბრუნებოდით?
-ნაკრები ნაკრებად, მაგრამ მე როგორც პატრიოტ ადამიანს მსურდა ქართული კლუბის სახელით მეთამაშა. „ტნტ“ მუდამ ტკბილად მაგონდება, შემდეგ კი გია ჭანტურიამ ბათუმში დააარსა საჭადრაკო კლუბი „ნონა“ და მეც დაუფიქრებლად გავხდი მისი ნაწილი.
ევროპის საკლუბო თასიც ბევრჯერ მოვიგეთ და სხვათა შორის ჩვენი უშუალო კონკურენტი სწორედ „მონტე-კარლო“ გახლდათ. ხან ჩვენ ვიგებდით, ხან ისინი.
ცნობილ მიზეზთა გამო წლევანდელი ტურნირი ონლაინ გაიმართა და გია ჭანტურიამ გადაწყვიტა „ნონა“ არ გამოეყვანა. ამიტომაც თავისუფალი აგენტი გავხდი. ჟან მიშელმა, რომელიც „მონტე-კარლოს“ პრეზიდენტია რომ გაიგო „ნონა“ შეჯიბრში არ მონაწილეობდა ორმაგად გაუხარდა. პირველი რომ უშუალო კონკურენტი ჩამოსცილდა და თან ჩემი დაბრუნება მოუნდა. მან ამ ფაქტორს დაჯილდოების ცერემონიალზეც გაუსვა ხაზი და ძალიან მესიამოვნა.
-ფრანგულ გუნდში დარჩენას აპირებთ?
-აქაურობა ძალიან მიყვარს. „მონტე-კარლოში“ წლების წინ ვთამაშობდი და შეიძლება ითქვას თავს ისე ვგრძნობს, როგორც საკუთარ სახლში. ევროპის ერთ-ერთი წამყვანი კლუბია და მუდამ უმაღლესი მიზნებისთვის იბრძვის. ბუნებრივია, სასიამოვნოა როდესაც ასეთი სახელოვანი გუნდის ნაწილი ხარ.
ატმოსფეროც იდეალურია, შემედგენლობაც ბრწყინვალე. 2021 წლის ევროპის საკლუბო თასს მონტე-კარლო უმასპინძლებს. მენდობიან, მაფასებენ და ამ ეტაპზე დარჩენა მაქვს გადაწყვეტილი, მაგრამ ნონას გუნდიც იმდენად მიყვარს, რომ თუ გაისად გადაწყვეტენ ტურნირში მონაწილეობის მიღებას, მაშინ დიდი ალბათობით დავუბრუნდები.
-ისე, ონლაინ ჭადრაკს როგორ აუღეთ ალღო? უჩვეულო შეგრძნება არ გაქვთ?
-ჭადრაკი ინტერნეტით აქამდეც იყო პოპულარული, ახლა კი შეიძლება ითქვას ნამდვილი ბუმია. სხვათა შორის, ამას წინათ დამაინტერესა, თვალი გადავავლე და აღმოვაჩინე, რომ Chess.com-ზე, რომელიც ყველაზე პოპულარული საჭადრაკო საიტია თუ ადრე ვთქვათ 100 ათასი პარტია თამაშდებოდა, ახლა ამ რიცხვმა მილიონს გადააჭარბა.
ბოლო პერიოდში ჭადრაკს სერიოზული პოპულარიზაცია გაუწია „ნეტფლიქსის“ ცნობილმა სერიალმა „ლაზიერის გამბიტი“ და ამიტომაც ონლაინ ბუმი აღარავის უკვირს. ისე, ბოლო პერიოდში ესპანეთში და თითზე ჩამოსათვლელ ქვეყნებში იმართება შეჯიბრი უშუალოდ საჭადრაკო დაფასთან. პანდემიამ ახალი რეალობა შექმნა, მაგრამ იმედია ყველაფერი ცუდი მალე წარსულში დარჩება და ჩვენც ჩვეულ რეჟიმში გავაგრძელებთ ტურნირებში მონაწილეობას.
-უახლოეს სამომავლო გეგმებზე რას გვეტყოდით?
-ყველაფერი თუ რიგზე იქნა ანუ პანდემიამ თუ გეგმები არ არია, იანვარში, გიბრალტარში მსოფლიო ქალთა გრან-პრის მეოთხე ეტაპი უნდა გაიმართოს და ამ ტურნირისთვის ვემზადები. ეს შეჯიბრი, თავისი დონითა და მნიშვნელობით უპრესტიჟულესია და იქ წარმატების მიღწევა არავისთვის არის მარტივი.
ამიტომ გულმოდგინედ ვემზადები და სრულად მასზე ვარ კონცენტრირებული.
-დაბოლოს. ნაკრებზეც გვითხარით ორიოდ სიტყვა.
-წელს, მოსკოვში საჭადრაკო ოლიმპიადა უნდა გვქონოდა, მაგრამ პანდემიის გამო გადაიდო. თავიდან ითქვა, რომ ერთი წლით, თუმცა ახლა გაირკვა, რომ ფიდემ ის 2022 წლისთვის გადაიტანა.
