შოთა არველაძემ ტაშკენტის ფახთაქორი ოფიციალურად დატოვა. ამის შესახებ ქართველმა მწვრთნელმა Facebook-გვერდზე დაწერა:
“სამი წლის შემდეგ, ფახთაქორის მთავარი მწვრთნელის პოსტს ვტოვებ. მინდა გულშემატკივრებს, გუნდს, ფეხბურთელებს, ჩემს სტაფს და ყველას, ვის მხარდაჭერსაც მთელი ამ პერიოდის მანძილზე ვგრძნობდი, მადლობა გადავუხადო. მადლობას ვუხდი კლუბის პრეზიდენტ ბაბურ შოდიევს, ულუგბეკ მუჰამედოვს, დიმიტრი ადისმანს და ფახთაქორის დირექტორთა საბჭოს ყველა წევრს, რათა მომეცა შესაძლებლობა, მემუშავა ამ გუნდში. კლუბში მისვლის შემდეგ ბევრი რამ შევცვალეთ, წავახალისეთ ახალგაზრდა ფეხბურთელები და დავამკვიდრეთ მუშაობის და თამაშის ჩვენი სტილი. კლუბს ვუსურვებ, ასეთივე წარმატებით გააგრძელოს მომავალშიც. უზბეკეთში მუშაობით მნიშვნელოვანი გამოცდილება მივიღე, როგორც კარიერული, ისე ცხოვრებისეული თვალსაზრისით. მოვიგეთ 5 ტიტული და შევიძინე არაერთი მეგობარი – ეს ყველაზე მნიშვნელოვანია. ახალი წლიდან, ახალი გამოწვევების დროა!” – წერს არველაძე.
შოთა არველაძესთან ერთად ფახთაქორი დატოვეს მისმა ასისტენტებმა, აჩი არველაძემ და გოჩა ტყებუჩავამაც.
ჯერჯერობით უცნობია სად გააგრძელებს 48 წლის სპეციალისტი საქმიანობას. როგორც მისმა ძმამ, აჩი არველაძემ განაცხადა, მათ რამდენიმე ვარიანტი აქვთ.
შეგახსენებთ, რომ ფახთაქორთან ერთად შოთა არველაძემ მიმდინარე წელს უზბეკეთის ჩემპიონატი და თასი მოიგო.
