კარჩაკეტილობას ასე თუ ისე ეგუებიან. რა თქმა უნდა, მკაცრი კარანტინის გამო არის წუწუნი და ვიშვიში, მაგრამ სხვა გზა არ აქვთ, ეგუებიან.
ახლა კი, ჩოგბურთელებს კიდევ ერთ სიახლესთან მოუწევთ ადაპტირება. მიხვდებოდით, ავსტრალიის ღია პირველობაზე ვსაუბრობთ.
წლის პირველი დიდი სლემის საორგანიზაციო კომიტეტის გადაწყვეტილებით, ჩოგბურთელებს სავარჯიშო პროცესში მხოლოდ ერთ სპარინგ-პარტნიორთან შეეძლებათ თამაში. მათ უნდა აირჩიონ რომელიმე ჩოგბურთელი და ბოლომდე მასთან ერთად ივარჯიშონ. აქ მარტო კორტზე ყოფნა არ იგულისხმება. მის გარეთაც მხოლოდ იმ ერთ პერსონასთან შეეძლებათ ურთიერთობა.
აქვე ისიც გაირკვა, რომ ერთ-ერთი ჩოგბურთელი ინფიცირებულია, თუმცა მისი ვინაობა არ ხმაურდება. Tennis Australia-ას აღმასრულებელი დირექტორის კრეიგ ტილის თქმით თუკი ტურნირის მიმდინარეობისას ვინმეს ვირუსი დაუდასტურდება ის გათამაშებიდან მოიხსნება.
ავსტრალიის ღია პირველობა, მელბურნში სტარტს 8 თებერვალს აიღებს.
