ნიკოლოზ ბასილაშვილი დოჰას უპრესტიჟულესი ტურნირის მეოთხედფინალშია. თითქოს რაღაც უცნაურად სასიამოვნო შეგრძნებაა. კარგად დავიწყებული ძველი რომ გაგახსენდება.
ფაქტია, რომ იანვრის შემდეგ და მანამდეც, ჩვენებური მეჩოგნე თამაშს-თამაშზე აგებდა და ისეთ რეგრესს განიცდიდა მტერსაც რომ არ უსურვებ. გულშემატკივარიც ალბათ დოჰას ტურნირისადმი სკეპტიკურად იქნებოდა განწყობილი, თუმცა საბედნიეროდ ყატარის დედაქალაქში სულ სხვა ნიკას ვხედავთ.
მოკლედ, ნიკოლოზ ბასილაშვილი აშკარად გამოფხიზლებულია და აგერ მეორე ეტაპიც მარტივად გადალახა. მეტოქედ კი მალეკ ჯაზირი ჰყავდა, რომელიც რეიტინგის 262-ე ნომერია.
ტუნისელ ჩოგბურთელს ბასილაშვილმა კუდით ქვა ასროლინა და ორ სეტში მარტივად – 6:2, 6:2 აჯობა.
ამრიგად, ქართველი ჩოგბურთელი დოჰაში უკვე საუკეთესო რვაშია და მისი მომდევნო მეტოქე დიდი ალბათობით არც მეტი, არც ნაკლები თვით როჯერ ფედერერი იქნება.
