ბოლო დროს უკრაინულ ფეხბურთში (ქართულშიც), 20 წლის შემტევი გიორგი წიტაიშვილის თემა ძალიან აქტუალური გახდა.
როგორც მოგეხსენებათ, უკრაინულ მედიაში გავრცელდა ინფორმაცია, რომ წარსულში ცნობილი ქართველი ფეხბურთელის, კლიმენტი წიტაიშვილის ვაჟი საქართველოს მოქალაქეობას მიიღებს და ჩვენს ნაკრებში ითამაშებს.
ამას ჩვენს მეგობარ სახელმწიფოში, საკმაოდ ნეგატიური შეფასებები მოჰყვა, გიორგის ზოგი კარიერის არევით დაემუქრა, ზოგმაც მოცდა და უკრაინის ნაკრებისგან შეთავაზების დალოდება ურჩია.
წიტაიშვილის თემაზე კომენტარი ცნობილმა მწვრთნელმა მირონ მარკევიჩმაც გამოთქვა, რომელიც ამჟამად ფედერაციაში ნაკრებების კომიტეტს ხელმძღძღვანელობს, მანამდე კი დნიპრო ევროპა ლიგის ფინალში გაიყვანა, სადაც გუნდის ლიდერები ჯაბა კანკავა და იევჰენ კონოპლიანკა იყვნენ.
როგორც მოსალოდნელი იყო მარკევჩმა გიორგის საქართველოს ნაკრებში თამაში არ ურჩია.
პირველ რიგში, ეს ფეხბურთელის პოზიციაზე, მის უახლოეს ნათესავებზეა დამოკიდებული. თუკი მას მოქალაქეობის შეცვლა სერიოზულად გადაწყვეტილი აქვს, მისი გადარწმუნება ძნელი იქნება. ყველა თავად ირჩევს თავის გზას.
წიტაიშვილი უკრაინის ნაკრების შემადგენლობაში ახალგაზრდებში მსოფლიოს ჩემპიონი გახდა. გიორგი ამბიციური ბიჭია და როგორც ჩანს, დარწმუნებულია, რომ მომავალში კიევის დინამოს ძირითადში დამკვიდრებას შეძლებს.
მაგრამ მირჩა ლუჩესკუს მოსვლის შემდეგ, გუნდში მისი – როტაციის მოთამაშის პოზიცია არ შეიცვალა. იმის გამო, რომ წიტაიშვილს სათამაშო პრაქტიკის პრობლემა არ ჰქონოდა, იჯარით ვორსკლაში გაუშვეს.
გიორგიმ ინტერვიუში თქვა, რომ პოლტავაში ყველაფერი აკმაყოფილებს, მაგრამ გამორიცხული არაა, რომ საერთაშორისო არენაზე აღიარებას უფრო სწრაფად მიაღწიოს, თუკი საქართველოს ნაკრებში გამოვა. ვურჩევდი, რომ არ აჩქარდეს. აჯობებს, თავისი თამაშით დაამტკიცოს, რომ დინამოში წამყვან როლს იმსახურებს.
ასეთ შემთხვევაში, უკრაინის ეროვნულ ნაკრებში მისთვის კარი ადვილად გაიღება. ახლა კი, სიმართლე ვთქვათ, მას გაუჭირდება კონკურენცია გაუწიოს ქვეყნის მთავარი გუნდის იმ ფეხბურთელებს, რომლებიც მის პოზიციაზე უკვე გამოდიან. არამხოლოდ უკრაინის, ნებისმიერ ნაკრებში თამაშის უფლება უნდა დაიმსახურო, – განაცხადა მარკევიჩმა.
