ავსტრალიის ღია პირველობაზე მხოლოდ ერთხელ – 2009 წელს იჩემპიონა, ისე კი ჩოგბურთის მოყვარულთ ალბათ შეხსენება არ სჭირდება, რომ რაფაელ ნადალი დიდი სლემის ტურნირების 20-გზის გამარჯვებულია.
ამჯერადაც, ის მელბურნში 21-ე მეიჯორის ტიტულს უტევს და თუ საწადელს მიაღწევს, დიადი როჯერ ფედერერის რეკორდს გააუმჯობესებს. რკინის როჯერს ხომ დიდი სლემები რაფას მსგავსად 20-ჯერ მოუგია.
რაფას 2021 წლის ავსტრალიის ღია პირველობის ჩემპიონობამდე ჯერ კიდევ მინიმუმ 3 მოგება აშორებს. ესპანელი მეჩოგნე იტალიელი ფაბიო ფონინის დამარცხებით მეოთხედფინალში გავიდა და სტატისტიკოსებმაც უმალ ამოქექეს, რომ ეს რაფასთვის კარიერაში დიდი სლემების 43-ე მეოთხედფინალი ყოფილა.
„მართლა? ნამდვილად არ ვიცოდი. ისე ნამდვილად ამაღელვებელი ციფრია“ – იტყვის რაფაელ ნადალი მედიასთან საუბარში.
მეოთხედფინალში, რაფაელ ნადალის მეტოქე ბერძენი სტეფანოს ციციპასი იქნება.
