2019 წელი, მარიამ ბოლქვაძისთვის მეტად წარმატებული გამოდგა. ჩოგბურთის ქართველ ქომაგებს აუცილებლად ემახსოვრებათ ამერიკის ღია პირველობა, სადაც ბათუმელმა სპორტსმენმა საკვალიფიკაციო ეტაპი ერთი ამოსუნთქვით გადალახა და ძირითად ბადეშიც პირველი წრის მატჩი მოიგო, შემდეგ კი გამოცდილ ჩეხ კაროლინა პლიშკოვასთან დამარცხდა.
მაშინ, მარიამ ბოლქვაძემ არა მხოლოდ წართული, ზოგადად საჩოგბურთო სამყარო აალაპარაკა და სპეციალისტებმაც მისთვის საქებარი სიტყვები არ დაიშურეს. იმ ამერიკულ თავგადასავალს კარიერული წინსვლაც მოჰყვა, რაც რეიტინგზეც აისახა და ქალთა შორის საქართველოს პირველი ჩოგანიც გახდა. რაც შეეხება მსოფლიო რეიტინგს, ამჟამად ბოლქვაძე რეიტინგის 192-ე ნომერია.
ჩოგბურთის მოყვარულთ ეცოდინებათ, რომ ავსტრალიის ღია პირველობის საკვალიფიკაციო ეტაპის მატჩები ნაცვლად მელბურნისა, დუბაიში მიმდინარეობს, სადაც ჩვენებური ჩოგბურთელი მეორე წრეში რუს მარგარიტა გასპარიანთან დამარცხდა.
„პრაიმსპორტი“ მარიამ ბოლქვაძეს დუბაიში შეეხმიანა და მასთან ვრცელი ინტერვიუ ჩაწერა.
-ყველას კარგად ახსოვს ამერიკის ღია პირველობა და იქ თქვენი წარმატებული თამაში. ამჯერად, ავსტრალიის ღია პირველობაზე იგივე შედეგი ვერ გაიმეორეთ. გულდაწყვეტილი იქნებით.
-თავისთავად. მარცხი, არცერთ ტურნირზე არავის სიამოვნებს, მითუფრო ისეთ დონის შეჯიბრზე, როგორიც დიდი სლემია.
ამერიკული ზღაპარი კი მართლაც ყოველთვის ტკბილად გამახსენდება. ვფიქრობ, იმ შედეგს თავისი ახსნაც ჰქონდა. მაშინ რადიკალურად განსხვავებული სიტუაცია იყო და ტურნირს სრულ მზადყოფნაში შევხდი, რადგან მანამდე ბევრი შეჯიბრი გამოვიარე და ტონუსში ვიყავი. ჩოგბურთელისთის ხომ მთავარი ტურნირები და კორტზე ხშირი ყოფნაა. ნიუ ორკში თავს თავდაჯერებულად ვგრძნობდი და ამან მოიტანა ის წარმატება.
-დუბაიში რა მოხდა? თავდაჯერებულობა გაკლდათ?
-მთლად ასეც ვერ ვიტყოდი. უბრალოდ, გლობალური პანდემიის ფონზე ბევრი რამ თავდაყირა დადგა. ამან ჩვენზეც იმოქმედა. 2020 წელი, როგორც ყველასთვის, ჩემთვისაც რთული იყო.
არაერთი ტურნირი ჩამივარდა, არ მქონდა შესაძლებლობა კორტზე ხშირად გავსულიყავი. ვარჯიშებს არ ვგულისხმობ, სათამაშო პრაქტიკა დამაკლდა. ამიტომაც, დუბაიში თავს ოდნავ დაძაბულად ვგრძნობდი, რაც პირველ წრეშიც თვალნათლივ გამოჩნდა.
-სასტარტო მატჩს და ტანდისთან მოგებას მოგვიანებით დავუბრუნდეთ. თქვენი აზრით მაინც რა იყო მიზეზი ძირითად ბადეში ვერ მოხვედრის? რაზე გმართებთ მუშაობა?
-მსოფლიოში შექმნილი სიტუაციიდან გამომდინარე, ვფიქრობ მაინც ნორმალურად შევძელი მოსამზადებელი პერიოდის გამოყენება. უფრო მეტიც შეიძლებოდა, მაგრამ როდესაც ყველაფერი შენზე არ არის დამოკიდებული, რთულია გაუმკლავდე.
დუბაიში, საკვალიფიკაციო ეტაპის დაწყებამდე თავდაუზოგავად ვვარჯიშობდი. მომავალშიც არ შევწყვეტ განვითარებაზე ფიქრს და შრომას და მჯერა დამიფასდება. სამუშაო და გამოსასწორებელი კიდევ ბევრი მაქვს, მაგრამ მთავარი ის არის, რომ ვფიქრობ სწორი მიმართულებით მივდივარ.
-ტანდისთან პირველი წრის დაპირისპირებას მივუბრუნდეთ. გამარჯვება კი შეძელი, მაგრამ საკმაოდ გაგიჭირდა. რა იყო ამის მიზეზი?
-სასტარტო მატჩს თავისი დაძაბულობა ნებისმიერ ტურნირზე თან ახლავს. ტანდისთან ფავორიტად ვითვლებოდი, ხოლო როდესაც შენგან უცილობელ მოგებას ელიან, ფსიქოლოგიურად ითრგუნები. ყოველთვის რთულია ასეთი მატჩების მოგება.
ინდოელი საკმაოდ კარგი ჩოგბურთელია. არ ველოდი და არც ვფიქრობდი, რომ მარტივად გავუმკლავდებოდი. მატჩის მიმდინარეობამ გამოაჩინა, რომ მაქსიმუმის გაღება მომიწევდა. საბედნიეროდ, ფსიქოლოგიური ფაქტორი გადავლახე და საჩოგბურთო ლატარეაში უკეთესი ვიყავი.
-მეორე წრეში კი გაცილებით ძლიერი მეტოქე გერგო. აქაც წინა პლანზე ფსიქოლოგიურმა მდგომარეობამ წამოიწია თუ კიდევ სხვა რამ მიზეზი იყო?
-მარგარიტა გასპარიანი გაცილებით გამოცდილი და ძლიერი ჩოგბურთელია, ვიდრე ტანდი. რუსი, საკვალიფიკაციო ეტაპის ერთ-ერთი ფავორიტია. მისი რეიტინგიც ამაზე მეტყველებს. არ გამოვრიცხავ სეზონის ბოლოს სულაც ასეულში შეაღწიოს.
ფსიქოლოგიურად ნამდვილად არ გავტეხილვარ. პირიქით, ყველა გათამაშებაში ბოლომდე ვიბრძოდი და ერთხელ მატჩბოლიც გადავარჩინე. როდესაც უკუბრეიქი შევასრულე და ანგარიში გავათანაბრე, შანსი გამიჩნდა მატჩი მესამე პარტიაში გადამეყვანა, თუმცა ტაიბრეიქზე ყველაფერი სხვაგვარად განვითარდა. გასპარიანმა, საჩოგბურთო ლატარეის რამდენიმე გათამაშებაში მართლაც უმაღლესი დონის ოსტატობა გამოავლინა.
ვფიქრობ, პირველ სეტში უკეთესად თამაშში მმართებდა. რამდენიმე შეცდომა დავუშვი, რამაც პარტია წამაგებინა. მეორე სეტში სტაბილურად ავთამაშდი, თუმცა გამარჯვებამდე საქმე მაინც ვერ მივიყვანე. ნებისმიერ შემთხთვევაში, ასეთ მეტოქეებთან დაპირისპირებები გზრდის და მეც სამომავლოდ გამომადგება.
-და მაინც. მეორე სეტში თითქოს გამოუვალი სიტუაციიდან შეძელი თავის დაძვრენა. როგორ ფიქრობ, მოგება არ შეგეძლო?
-ასე გადაჭრითაც ვერ ვიტყვი, რომ არ შემეძლო. ტაიბრეიკს უცნაურობები ახასაითებს. სამწუხაროდ, ჩემი დღე არ გამოდგა, მაგრამ იმაში კი დავრწმუნდი, რომ მოგებაზე ფიქრი ყველასთან შეიძლება. მთავარია კორტზე სიბრძნე გამოავლინო, ჭკვიანურად ითამაშო, შეცდომები მინიმუმამდე დაიყვანო და ბოძებული შანსები გამოიყენო.
-როგორ ფიქრობ, საკვალიფიკაციო ეტაპი, ნაცვლად დუბაისა ტრადიციისამებრ მელბურნში რომ გამართულიყო აჯობებდა? თუ ამას თქვენთვის განსაკუთრებული მნიშვნელობა არ ჰქონდა?
-ამისთვის დიდი მნიშვნელობა არ მიმინიჭებია. მთავარი იყო, რომ მიუხედავად უამრავი დაბრკოლებისა და გამოწვევისა, წლის პირველი დიდი სლემის ტურნირი არ ჩაიშალა. ძირითად ბადეში დუბაიდან გავიდოდი თუ მელბურნიდან აზრი არ ჰქონდა. სამწუხაროს, რომ ეს ვერ შევძელი.
ორგანიზატორებს დიდი მადლობა, რომ თუნდაც სხვა ქვეყანაში, მაგრამ მაინც მოგვცა შანსი მეიჯორის დონის ტურნირის გამოცდილება მიგვეღო და სათამაშო პრაქტიკა აგვემაღებინა.
-რა არის მიმდინარე სეზონში თქვენი მიზანი? რაიმე კონკრეტული ხომ არ გაქვთ ჩაფიქრებული? ვთქვათ, რეიტინგზე ზრუნვა?
-რეიტინგი რა თქმა უნდა მნიშვნელოვანია, მაგრამ ამ მხრივ ჩაციკლული არ ვარ. მთავარი მიზანი და პრიორიტეტი მაინც სათამაშო ხარისხის გაუმჯობესებაზე ზრუნვა იქნება.
წინ ხანგრძლივი კარიერა მელის და მინდა ეს დრო სტაბილურობის გამომუშავებას დავუთმო და უფრო გრძელვადიან პერსპექტივაზე ვიფიქრო, ვიდრე ახლო მომავალზე.
-დაბოლოს. გრძელვადიანი გეგმები გასაგებია, მაგრამ წლეულს უახლოეს გეგმებზე რას გვეტყოდით?
-წინასწარ თქმა გამიჭირდება. პანდემიის გამო წლევანდელი გეგმები ოდნავ არეულია და რთულია რაიმეს კონკრეტულად თქმა. ტურნირების დაგეგმვაც ჭირს.
ერთადერთი რაც გადაჭრით შემიძლია გითხრათ ის არის, რომ დუბაიში დავრჩები და მომავალ კვირას 25 ათასიან ტურნირს ვითამაშებ. შემდეგ უკვე გამოჩნდება რა და როგორ.
