პირველი ქართული პროფესიული ფრენჩაიზი “შავი ლომი” რაგბი ევროპის სუპერთასის მე-2 მატჩისთვის შევარდენის სანაკრებო ბაზაზე ემზადება. ქართველი მორაგბეები ხვალ დილით პენზაში გაემგზავრებიან, სადაც 23 ოქტომბერს, თბილისის დროით 13:30 საათიდან “ლოკომოტივს” დაუპირისპირდებიან.
მატჩის წინ მედიასთან “შავი ლომის” მთავარმა მწვრთნელმა ლევან მაისაშვილმა ისაუბრა.
“გვქონდა მცირე ტრავმები, რომლებსაც რეაბილიტაცია სჭირდებოდა. გარდა ამისა, რამდენიმე მოთამაშეს ფაიზერის აცრა უწევდა, რადგან სხვა მხრივ საფრანგეთში არ შეუშვებენ. შედეგად, რამდენიმე დღე მათაც ვერ ივარჯიშეს და სრული შემადგენლობა დღეს შევიკრიბეთ.
მიუხედავად ამისა, ნორმალურად ვართ მომზადებული და იმედს ვიტოვებთ, რომ პირველი მატჩის შემდეგ ხარისხი უკეთესი იქნება. ჩვენი მიზანიც სწორედ ესაა, რომ თამაშიდან თამაშამდე განვვითარდეთ, დეტალები დავხვეწოთ და მორაგბეებს საერთაშორისო გამოცდილება მივცეთ.
სამწუხაროდ დიდი ხნით გამოგვაკლდა სოსო მათიაშვილი, რომელმაც მუხლის ტრავმა თელ ავივ ჰითთან მატჩში მიიღო. მან ჯვარედინი დაიზიანა და საოპერაციოა. ჯერ არ დაბრუნებულან მანამდე ტრავმირებული მოთამაშეები. მათგან ერთ ან ორ მორაგბეს ენისეისთან მატჩის წინ ველით.
ლოკომოტივს ის უპირატესობა აქვს, რომ შეთამაშებული გუნდია. მათ მაღალი, ჯანიანი ბიჭები ჰყავთ და სოლიდურად გამოიყურებიან დერეფანში, შეჯახებებში. ლოკომოტივში რამდენიმე ქართველი მორაგბე თამაშობს, რომლებიც თავიანთ პოზიციებზე კარგად გამოიყურებიან”, – განაცხადა მაისაშვილმა.
“შავი ლომი” პენზასთან მატჩის შემდეგ შინ დაბრუნდება და 30 ოქტომბერს სოჭში, “ენისეისთან” გასამართი შეხვედრისთვის მოემზადება.
