ლიონელ მესიმ “პსჟ-ის” ფეხბურთელის რანგში პირველი პრესკონფერენცია გამართა.
“პირველ რიგში, მსურს მადლობა გადავუხადო კლუბის პრეზიდენტს კეთილი სიტყვებისთვის. მიხარია, რაც ხდება. იოლი არ იყო ბარსელონას დატოვება, რადგან ამ კლუბში მრავალი წელიწადი გავატარე. არ იყო ადვილი, მაგრამ როდესაც აქ მოვედი, კმაყოფილების გრძნობა დამეუფლა.
პარიზში მე და ჩემმა ოჯახმა პირველივე წუთებიდან ვიგრძენით კომფორტი. ახლა ჩემი ერთადერთი სურვილი ისაა, მალე დავიწყო ვარჯიში. მსურს კლუბს მადლობა გადავუხადო თბილი მიღებისთვის.
კვლავაც მწყურია თამაში და გამარჯვებები, ზუსტად ისე, როგორც კარიერის დასაწყისში. ეს არის კლუბი, რომელიც შეძლებს ტიტულებისა და ჯილდოების მოპოვებას. აი, ამიტომ მოვედი აქ. ჩვენ ამას განვახორციელებთ.
ბევრისთვის ჩემი პარიზში ჩამოსვლა მოულოდნელობა იყო. ჩემთვის კომფორტული იქნება პსჟ-ში თამაში”, – თქვა მესიმ პრესკონფერენციაზე.
შეგახსენებთ, რომ მესიმ პსჟ-სთან 2-წლიანი კონტრაქტი გააფორმა. ცნობილია, რომ პარიზულ კლუბში არგენტინელის ხელფასი წელიწადში 35 მილიონი ევრო იქნება. მესის დებიუტი პსჟ-ში 14 აგვისტოს უნდა შედგეს, პარიზელები ლიგა 1-ის მე-2 ტურში “სტრასბურს” დაუპირისპირდებიან.
