ცოტა ხნის წინ ხმაური იყო რაგბის კავშირის ოფისში. ვეტერანი მორაგბეები და ირაკლი აბუსერიძის მხარდამჭერები რაგბის კავშირის პრეზიდენტთან შესახვედრად მივიდნენ, თუმცა როგორც ისინი ამტკიცებენ, მათ ოფისის კარი ჩაუკეტეს და შენობაში არ შეუშვეს.
„მოვედით სპორტული საკითხების განსახილველად, ბევრი კითხვა გვაქვს. უნდათ, რომ დიდი 10 შეკვეცონ და 8 გუნდამდე ჩამოიყვანონ. არის კითხვები ფინანსებთან დაკავშირებით, გვინდა მომავალ წელზე დავიგეგმოთ და ისიც არ ვიცით ბიუჯეტი რამდენი იქნება. ინფორმაციის სრული ვაკუუმია, სამარცხვინოდ ჩაიკეტნენ და პრეზიდენტიც დაიმალა. უნდა მოსულიყო და არ მოვიდა. პოლიციის 2 ეკიპაჟი გამოიძახეს“, – განაცხადა ირაკლი მაჩხანელმა.
რაც შეეხება რაგბის კავშირის პოზიციას, კავშირის ვიცე-პრეზიდენტმა ნიკოლოზ ალავიძემ ჟურნალისტებთან განაცხადა, რომ ირაკლი აბუსერიძის მხარდამჭერებთან შეხვედრა დღის წესრიგში არ იდგა და მათთან დალაპარაკებაც სწორედ ამიტომ ვერ მოხერხდა.
„დიდი 10-ის შეკვეცაზე საუბარი არ არის, საუბარია რეფორმაზე. საწყის ეტაპზეა ეს ყველაფერი,რაც გამგეობის სხდომის ოქმშიც წერია. არ იგეგმება ფინანსების შეკვეცაც.
კარების საკეტთან თუ დაინახავთ, იქ არის კოვიდ რეგულაციების გამო დაწესებული შეზღუდვა. წინასწარ არის ადამიანების სია განსაზღვრული ვინც დადის. პოლიციის გამოძახება ხდება ხოლმე პერიოდულად და ეს აუცილებელი იყო“, – განაცხადა ნიკოლოზ ალავიძემ.
ადგილზე ამ დროისთვის სიმშვიდეა, თუმცა სიტუაციის პრევენციის მიზნით რაგბის კავშირის შენობასთან პოლიციის რამდენიმე ეკიპაჟი რჩება.
