საქართველოს რაგბის კავშირსა და ბრიტანულ მედია-გიგანტ Future plc-ს შორის ურთიერთთანამშრომლობის ხელშეკრულება გაფორმდა.
ინგლისი რაგბის სამშობლოა. აქ გაგორდა პირველად ოვალური ბურთი. ეს ქვეყანა მსოფლიოს ლიდერთა შორისაა პოლიტიკური, კულტურული და საზოგადოებრივი ცხოვრების სხვადასხვა სფეროში. ლონდონი მსოფლიოს ფინანსური დედაქალაქიცაა. ამიტომ, ცხადია, საქართველოს რაგბის კავშირისთვის, ამ ქვეყანასთან სხვადასხვა მიმართულებით თანამშრომლობა პრიორიტეტულია.
ასევე დიდი პატივია ისეთი დონის გიგანტ კომპანიასთან თანამშრომლობა, როგორიც Future plc-ია. საქართველოს რაგბის კავშირი, რაგბის ჟურნალისტთა ლიგა და კომპანია „ფიუჩერ ჯორჯია“ ჟურნალ Rugby World GEORGIA-ს გამოცემას იწყებს.
Rugby World – მსოფლიოს გლობალური, წამყვანი სარაგბო ჟურნალია, რომელიც ბრიტანული გიგანტი მედია-კომპანიის, Future plc შემადგენელი ნაწილია. Future plc 1985 წელს დაარსდა და სხვადასხვა სფეროს 150-ზე მეტ ჟურნალს და ვებ-გამოცემას აერთიანებს
ჟურნალისტთა ლიგა სპორტულმა ჟურნალისტებმა – თემურ ჯაფარიძემ, ზაალ გიგინეიშვილმა, ბესიკ ჯანგავაძემ, ზურა ქსოვრელმა და ლუკა ჭოჭუამ დააფუძნეს. ამ ადამიანების ღვაწლი საქართველოში რაგბის პოპულარიზაციის საქმეში შეუფასებელია. ისინი დღესაც რაგბის სამსახურში არიან.
მათ მიერ დაფუძნებული ორგანზაცია, ფიუჩერ ჯორჯიასთან – რომლის დირექტორიც დავით სამსონაძეა და საქართველოს რაგბის კავშირთან ერთად გამოსცემენ ჟურნალს, რომელიც რაგბის გულშემატკივარს ქართული და საერთაშორისო რაგბის შესახებ, მიმდინარე და ანალიტიკურ სტატიებს ქართულ და ინგლისურ ენებზე შესთავაზებს.
მაღალ პოლიგრაფიულ დონეზე შესრულებული, დაახლოებით 100 გვერდიანი გამოცემა კვარტალში ერთხელ გამოვა. მის ბეჭდვას, ასევე საქართველოსა და მის ფარგლებს გარეთ გავრცელებას მედია ჰოლდინგი „პალიტრა“ უზრუნველყოფს. აღსანიშნავია, რომ ასევე შეიქმნება Rugby World GEORGIA-ს ციფრული გამოცემები.
ხელშეკრულებას თანამშრომლობის შესახებ ხელს საქართველოს რაგბის კავშირის პრეზიდენტმა იოსებ ტყემალაძემ და Future plc-ის საერთაშორისო ურთიერთობების მიმართულების ხელმძღვანელმა ბრენდონ ბესტერმა „თბილისი მერიოტში“ მოაწერეს.
„ინგლისი რაგბის სამშობლოა, სადაც ამ თამაშის რაობა ყველაზე კარგად ესმით და საქართველოს რაგბის კავშირისთვის ამ ქვეყანასთან სხვადასხვა მიმართულებით თანამშრომლობა ერთობ საშური საქმეა. Future plc-ი მსოფლიო დონის ბრენდია. შესაბამისად, ამ კომპანიასთან თანამშრომლობა დიდი პატივი და, ამასთან ერთად, პასუხისმგებლობაცაა“.
„ინგლისთან თანამშრომლობა შემთხვევით არ აგვირჩევია. ამ ქვეყანასთან ჩვენ ბევრი საერთო გვაქვს: რამდენჯერმე მიგვიწვიეს ერთობლივ ვარჯიშებზე; ბოლო წლებში საქართველოს ერთ-ერთ ყველაზე წარმატებულ კლუბს ‘ლელო-სარასენსი’ ქვია. ჩვენ ლელო ბურთის ისტორია გვაქვს და მოხარული ვარ, რომ ერთიანი ნაბიჯების გადადგმას ვიწყებთ“.
„თემურ ჯაფარიძე, ზაალ გიგინეიშვილი, ბესიკ ჯანგავაძე, ზურა ქსოვრელი და ლუკა ჭოჭუა ის ადამიანები არიან, რომლებზეც დგას ქართული რაგბი და მათი ჟურნალისტური გამოცდილება მთელს მსოფლიოს წაადგება. რაგბის კავშირი ღიაა, რათა წარმატებებთან ერთად, მოხდეს პრობლემების გაშუქება“.
„დარწმუნებული ვარ, რომ საქართველოში გამოცემული ორენოვანი ჟურნალი მნიშვნელოვნად გაზრდის როგორც საქართველოში არსებულ სარაგბო აუდიტორიას და დააკმაყოფილებს მათ წყურვილს, ასევე ითამაშებს მნიშვნელოვან როლს საერთაშორისო ასპარეზზე – ქართული სპორტის, კულტურის და ბიზნესის პოპულარიზაციაში. რამეთუ ეს სივრცე ატარებს როგორც საინფორმაციო საგანმანათლებლო დატვირთვას, ასევე საუკეთესო საშუალებაა წარმატებული ბიზნესის შესახებ ინფორმაციის მიზნობრივ ჯგუფებამდე მისატანად“ – თქვა რაგბის კავშირის პრეზიდენტმა იოსებ ტყემალაძემ.
„დიდი მადლობა „ფიუჩერ ჯორჯიას“, რაგბის ჟურნალისტთა ლიგას და რაგბის კავშირს ამ შესაძლებლობისთვის. ჩემთვის დიდი პატივია ვიყო თქვენი სტუმარი და შევხვდე ქართული რაგბის ოჯახს“ – ქართულ მხარეს მიესალმა ბრენდონ ბესტერი.
ოფიციალური მხარის დასრულების შემდეგ, ტყემალაძემ ბესტერს სამახსოვროდ ქართული სპორტის „ოქროს წიგნი“ გადასცა. ღონისძიებას ესწრებოდა ქართული რაგბის ერთ-ერთი ფუძემდებელი გივი მრელაშვილი, რომელმაც სტუმარს ასევე სამახსოვრო საჩუქარი გადასცა.
შეხვედრაზე იყვნენ საქართველოში ბრიტანეთის ელჩის მოადგილე ქალბატონი კლერ ოლბლესი, რაგბის კავშირის ყოფილი პრეზიდენტი გია ნიჟარაძე, გამგეობის წევრები და ვეტერანი ბორჯღალოსნები.
„დიდი მადლობა მინდა გადავუხადო მედია ჰოლდინგ „პალიტრას“, რომელიც წლებია წარმატებით თანამშრომლობს საქართველოს რაგბის კავშირთან. ეს თანამშრომლობა კიდევ უფრი ღრმავდება და ახალ ეტაპზე გადავდივართ. ერთად მოხდება Rugby World GEORGIA-ს გამოცემა, უზრუნველყოფს უმაღლესი ხარისხით ბეჭდვას და გავრცელებას როგორც ქვეყნის შიგნით, ასევე მის ფარგლებს. რომ არა ეს მხარდაჭერა ძალიან გაგვიჭირდებოდა ამ წამოწყების განხორციელება“ – განაცხადა რაგბის კავშირის ვიცე-პრეზიდენტმა ნიკოლოზ ალავიძემ.
„მოხარული ვარ რომ ასეთ თანამშრომლობას ჩაეყარა საფუძველი. ქართულ რაგბს მთელი მსოფლიო გაიცნობს, რაც მნიშვნელოვანია“ – თქვა კლერ ოლბლესმა.
სარაგბო ჟურნალის გამოცემას რაგბის პოპულარიზაციისთვის უმნიშვნელოვანესად მიიჩნევს ვეტერანი ბორჯღალოსანი გია ლაბაძე:
„როგორც ჩვენ, ასევე ჩვენი წინამორბედი და შემდგომი თაობები სწორედ იმისკენ მივისწრაფოდით, რომ მსოფლიო რაგბში დაგვემკვიდრებინა ადგილი და ეს ერთ-ერთი დიდი ნაბიჯია ამ მიმართულებით. იმისათვის, რომ პროგრესი გქონდეს, აუცილებელია გაშუქება იყოს შესაბამისი. ამას მოსდევს პოპულარიზაცია, რაც შემდგომში ჯანსაღი ცხოვრების წესის საწინდარია.
