ევროპის საფეხბურთო ჩემპიონატზე მეორე ტურის მატჩები გახურდა. მიმდინარე ევროპირველობაზე განვითარებულმა ცნობილმა მოვლენებმა, კერძოდ კი კრისტიან ერიქსენის ამბავმა საფეხბურთო სამყარო გააერთიანა და ისე მოხდა მილიონობით ნეიტრალური ქომაგი დანიის ნაკრებისადმი სიმპატიით განაწყო.
დანიური დინამიტი, მეორე ტურში, ბელგიასთან დაპირისპირების დროს სტარტზევე აფეთქდა, თუმცა სკანდინავიელებმა ძლიერ მეტოქესთან მაინც წააგეს – 1:2.
ორი ტურის შემდეგ დანიელები უქულოდ არიან, მაგრამ ამით ყველაფერი არ დასრულებულა. ჯგუფის დასკვნითი მატჩი მათ კოპენჰაგენში, კვლავ შინაურ კედლებში რუსეთის ნაკრებთან ელით და გამარჯვების შემთხვევაში პლეიოფში შესაძლოა სულაც მეორე ადგილით გავიდნენ.
სწორედ ამაზე ამახვილებს ყურადღებას დანიელთა თავკაცი კასპერ ჰიულმანდიც.
„უდიდეს მხარდაჭერას და თანადგომას ვგრძნობთ. ტრიბუნებზე შეკრებილი ათასობით გულშემატკივრის და სხვა უამრავი ადამიანისგან სიყვარულს ყოველი ფეხის ნაბიჯზე ვხედავთ.
ეს არი მთავარი, ხალხის სიყვარული. გუნდი ერთ მუშტად არის შეკრული. ეს ფაქტორიც ძალზედ მნიშვნელოვანია.
ბელგიასთან დაპირისპირების დროს იყო არაერთი პოზიტივი და შეგვიძლია ბევრი სასარგებლო დასკვნაც გამოვიტანოთ, რაც სამომავლოდ წაგვადგება.
უკვე რუსეთის ნაკრებთან მატჩზე ვფიქრობ. დაკარგული ჯერ არაფერია“ – აღნიშნავს დანიის ნაკრების მთავარი მწვრთნელი.
დანიის და რუსეთის დაპირისპირება 21 ივნისს გაიმართება.
