ყოჩაღი „ლაიპციგი“ ჩემპიონთა ლიგის პლეიოფის პირველ დაპირისპირებაში „ლივერპულთან“ 0:2 დამარცხდა და სავარაუდოდ ტურნირსაც გამოეთიშება. ფეხბურთში სენსაციებს რა დალევს და მითუფრო გერმანული გუნდების შესრულებით, მაგრამ ვგონებთ „ლაიპციგს“ ორბურთიანი ჩამორჩენის აღმოფხვრა, თანაც სტუმრად მერსისაიდელებთან ძალიან გაუჭირდებათ.
რა თქმა უნდა, შედეგით უკმაყოფილი იყო გერმანელთა ახალგაზრდა მთავარი მწვრთნელი იულიან ნაგელსმანი. მან მატჩის შემდეგ პრესკონფერენციაზე ყურადღება სითამამეზე გაამახვილა.
„რატომღაც შებოჭილად გამოვიყურებოდით, განსაკუთრებით პირველ ტაიმში. მეტოქე ბურთს კი აკონტროლებდა, მაგრამ საგოლე მომენტები ბევრი არ ჰქონია.
მეორე ტაიმში კი გავთამამდით და შეტევებს ვუმატეთ, თუმცა გოლები იქეთ მივიღეთ. სამწუხაროდ ორივეჯერ უაზრო შეცდომების გამო დავისაჯეთ. შეცდომები ფეხბურთის ნაწილია, სხვანაირად არ ხდება.
წაგების ერთ-ერთი მიზეზი ისიც იყო, რომ დამაგვირგვინებელ ფაზაში ვცოდავდით. საპასუხო მატჩში სწორედ ამის გამოსწორებაზე უნდა ვიზრუნოთ. დღეს ვაჩვენეთ, რომ მომენტების შექმნა შეგვიძლია. განმეორებით შეხვედრაშიც იგივე სტილში უნდა ვითამაშოთ, ოღონდ იმ განსხვავებით, რომ დაცვაში შეცდომები აღარ დავუშვათ“ – თქვა იულიან ნაგელსმანმა.
