რუსულმა ვებგვერდმა Metaratings-მა გაავრცელა ინფორმაცია, რომ “მილანმა” ხვიჩა კვარაცხელიას ტრანსფერი შეათანხმა, მაგრამ ამ ინფორმაციას იტალიური მედია არ ადასტურებს. გავლენიანი გამოცემები ამ საკითხზე არაფერს წერენ, “მილანთან” დაახლოებულმა ჟურნალისტებმა კი, ინფორმაცია უარყვეს.
“როგორ ჩანს, “მილანში” კვარაცხელიაზე აზრი არ შეუცვლიათ: ფეხბურთელს აკვირდებიან, მაგრამ ამჟამად არანაირი მოლაპარაკება ან ინტერესი არ არის”, – წერს დანიელე ლონგო, რომელიც Calciomercato-ს ჟურნალისტია და სწორედ მილანურ თემებზე მუშაობს.
შეგახსენებთ,რომ ხვიჩა კვარაცხელიას ფასი Transfermarkt-ის მონაცემებით ამ დროისთვის 18 მილიონი ევროა. ქართველი ფეხბურთელი ყაზანის “რუბინში” 2019 წლიდან თამაშობს, 51 შეხვედრაში 7 გოლი გაიტანა და 13 საგოლე პასი შეასრულა. მას რუსულ გუნდთან კონტრაქტი 2024 წლის ზაფხულამდე აქვს გაფორმებული.
