რაგბის კავშირის პრეზიდენტობის ახალი კანდიდატი, იოსებ ტყემალაძე ტელეკომპანია რუსთავი 2-ის ეთერში გადაცემა სპორტის საათს სტუმრობდა და საკმაოდ ამომწურავად ისაუბრა.
მან კონკურენტებზე ძალიან მეგობრულად ისაუბრა და თანამშრომლობის სურვილი ყველასთან გამოთქვა:
ჩემი ხასიათი ასეთია, მიყვარს სირთულეებთან შეჭიდება. მინდა ყველამ ერთად ვიპოვოთ გამოსავალი, დღეს რაგბის ნამდვილად დახმარება სჭირდება.
წლების განმავლობაში ეს სპორტი ძალიან გაიზარდა, ეს რათქმაუნდა მოთამაშეების და მასში დასაქმებული ხალხის დამსახურებაა.
ამან ფინანსების სწრაფი ზრდა გამოიწვია, რაც გამართულ მენეჯმენტს მოითხოვდა, ამის არარსებობის გამო ბევრი კითხვა გაჩნდა.
არჩევნები თავიდანვე ხარვეზებით ტარდებოდა, რაზეც ბაჩო ხურციძე აპელირებდა და მისი გამარჯვების შემთხვევაში, იგივე პრეტენზიები მეორე მხარეს ექნებოდა.
ირაკლის ღრმა ბავშვობიდან ვიცნობ და მისი კარიერის მანძილზე არაერთხელ მიამაყია. ბევრჯერ ვურჩიე, რომ ყველაფერი ზედმეტი ემოციების გარეშე გაერკვია, თუმცა მან ეს არ გაითვალისწინა, რამაც სიტუაცია ძალიან არია, ქართული რაგბის შემონახული სახელი კი შეიბღალა.
ბაჩოსთან, ირაკლისთან და გოჩასთან კონფლიქტი რა თქმა უნდა არ არსებობს. მე მათ შევთავაზე, რომ ყველა გავერთიანდეთ, დავალაგოთ გეგმები და რაგბის უკეთესი მომავალი შევუქმნათ.
შეთავაზებას ბაჩო ხურციძე მალევე გამოემაურა და თანამშრომლობის სურვილი გამოდგა. გასული 8 დღის განმავლობაში მოვიარე უამრავი გუნდი, შევხვდი ადამიანებს, ავუხსენი სიტუაცია, რომ მენეჯმენტში პრობლემებია და ეს სწრაფადაა მოსაგვარებელი.
რაგბისთან კავშირი რათქმაუნდა მქონდა, დიახ ლევან მაისაშვილის მეჯვარე ვარ, „ციდან ვერ ჩამოვვარდებოდი“, მართალია დიდი რაგბი არასდროს მითამაშია, თუმცა შეგიძლიათ ნახოთ რა მიკეთებია და დარწმუნდებით, რომ შემიძლია ჩემი ნეიტრალურობით სიტუაცია უკეთესობისკენ შევცვალო.
წესდება მალე უნდა შეიცვალოს, გამგეობის წევრები აუცილებლად არჩევითი უნდა იყვნენ, რადგან გამჭვირვალეობის პრობლემაა.
რაგბმა ბატონი ბიძინას ინიციატივით საკმაოდ კარგი ბაზები შეიძინა, მაგალითად ქუთაისი რაგბის მექაა, ასევეა ბათუმი და სხვა ქალაქები. წესით უკვე დიდ ასპარეზზე უნდა ვიყოთ, თუმცა ხალხს კავშირში მოსვლა აღარ უხარიათ.
მე ერთპიროვნულ გადაწყვეტილებას არ ვიღებ, ვფიქრობ გამგეობა ყველაფერს მოაგვარებს, მინდა ყველაფერი დალაგდეს, 4 წლის შემდეგ მე წავიდე და კვლავ აბასთუმნის მშენებლობა გავაგრძელო.
მე ჩემი გუნდი არ მყავს, ყველანი ჩემები არიან. არსებობს თანაბრობის პრინციპი, შესაქმნელია სტრუქტურა, უნდა მოხდეს მოძველებული წესდების მოდერნიზება, ჩვენ უნდა დავიწყოთ დიდი მიზნისკენ სვლა, რაც მსოფლიო ჩემპიონობაა. ეს რათქმაუნდა გრძელვადიანი მიზანია, თუმცა გეგმა ეს არის, – განაცხადა იოსებ ტყემალაძემ.
