ავსტრალიის ღია პირველობამდე ჯერ კიდევ დროა, თუმცა ჩოგბურთელები მელბურნში უკვე იკრიბებიან. უფრო სწორად, მათი დიდი ნაწილი მწვანე კონტინენტზე კი ჩაფრინდა, მაგრამ თითქმის 50 ჩოგბურთელს ორი კვირის გატარება მკაცრ კარანტინში მოუწევს.
არა, ავსტრალიის მთავრობის და საორგანიზაციო კომიტეტის მიერ შემუშავებული რეგულაციებით ჩოგბურთელებს იზოლაციაში ყოფნა ისედაც მოუწევდათ, მაგრამ ყოველდღიურად გარკვეული საათები კორტზე გასვლა და ვარჯიში ნებადართული ჰქონდა, ახლა კი 14 დღე სასტუმროს ნომრიდან ცხვირი არ უნდა გამოჰყონ.
მიზეზი კი ჩარტერულ რეისებში აღმოჩენილი ინფიცირებული ადამიანებია. ამას წინათაც გამცნეთ, რომ აბუ-დაბიდან და ლოს-ანჟელესიდან მელბურნისკენ მიმავალ თვითმფრინავში, რომლებსაც ავსტრალიის ღია პირველობის მონაწილე ჩოგბურთელები გადაჰყავდა კოვიდიანი პიროვნებები აღმოჩნდნე. ამიტომაც სალონში მყოფი ყველა ადამიანი აეროპორტიდანვე სასტუმროებში გააქანეს და 14 დღით გამოკეტეს.
მათ შორის აღმოჩნდა, საქართველოს ნაკრების წევრი ოქსანა კალაშნიკოვა, რომელიც მელბურნში აბუ-დაბიდან მიემართებოდა. ჩოგბურთის მოყვარულებს ეცოდინება, რომ აბუ-დაბიში, ერთეულთა თანრიგში ქალთა შორის საკვალიფიკაციო ეტაპის მატჩები გაიმართა და იქ გამარჯვებულებმა ავსტრალიისკენ აიღეს გეზი. სამწუხაროდ, ეკატერინე გორგოძემ და მარიამ ბოლქვაძემ ძირითად ბადეში ასპარეზობის უფლება ვერ მოიპოვეს, კალაშნიკოვა კი უკვე წლებია წყვილთა თანრიგში თამაშობს და საკმაოდ წარმატებითაც.
„პრაიმსპორტი“ ოქსანა კალაშნიკოვას კალაშნიკოვას მელბურნში შეეხმიანა და მას ამ და სხვა თემებზე ესაუბრა.
-მელბურნში ჩასვლის შემდეგ უცნაურ სიტუაციაში აღმოვჩნდი. ვერც წარმოვიდგენდი თუ იმ თვითმფრინავში ინფიცირებული ადამიანები იქნებოდნენ.
ავსტრალიაში აბუ-დაბიდან გავფრინდით, სადაც გეცოდინებათ საკვალიფიკაციო ეტაპის მატჩები გაიმართა. თვითმფრინავში არაერთი მაღალი დონის ჩოგბურთელი იყო. ესენი იყვნენ ბელინდა ბენჩიჩი, ბარბარა სტრიკოვა, სვეტლანა კუზნეცოვა, ონს ჟაბერი, ჯენიფერ ბრედი, დიანა იასტრემსკაია და სხვები.
აბუ-დაბიში წლის პირველ ტურნირზე ვიმყოფებოდი. შემდგომი გეგმის მიხედვით კი ყველა ჩოგბურთელი, ვინც იმ პერიოდში აბუ-დაბიში იყო, სწორედ იქიდან უნდა გამგზავრებულიყო ავსტრალიაში. ასეც მოხდა და გამოვფრინდით, თუმცა შემდეგ მონასტერი აირია.
-როგორ მოხდა, რომ იმ თვითმფრინავში ინფიცირებული ადამიანები აღმოჩნდნენ? ტესტირება ხომ გაიარეს?
-ეს მეც მიკვირს. მართლაც უცნაურია ამბავია. ჩემი ინფორმაციით, თვითმფრინავში ჩასხდომამდე ყველა მგზავრი კოვიდთან მიმართებაში ნეგატიური იყო. მათ ტესტირება გაიარეს.
მელბურნში ჩასვლის შემდეგ, აეროპორტში ხელახალი ტესტირების დროს ერთ-ერთ ჩოგბურთელს კორონავირუსი აღმოაჩნდა. ეს მართლაც მოულოდნელი რამ იყო. სხვა გზა აღარ გვქონდა, რეგულაციებს უნდა დავმორჩილებოდით და სალონში მყოფი ყველა ადამიანი კარანტინში გადავსულიყავით.
-ახლა რა პირობებში იმყოფებით? ორი კვირა საერთოდ ვარჯიშის უფლებაც არ გაქვთ?
-სამწუხაროდ არა. ყველაფერი მკაცრად კონტროლდება. სასტუმროს ნომერს ვერ დავტოვებთ. რომ არა ეს შემთხვევა, მაშინ დღეში 5 საათი კორტზე გასვლის და ვარჯიშის უფლება გვექნებოდა, ახლა კი ეს უნდა დავივიწყოთ.
სხვათა შორის, დღეს, ტურნირის ორგანიზატორები შეგვპირდნენ, რომ გარკვეულ მოწყობილობებს სასტუმროს ნომრებში მოგვიტანენ და გარკვეულწილად შევძლებთ ტონუსი შევინარჩუნოთ. სავარაუდოდ საუბარია ფიტნეს ველოსიპედებზე. ეს ყველაფერი ფიზიკური კონდიციები შენარჩუნებაში კი დაგვეხმარება, მაგრამ კორტს ხომ ვერ შეგვიცვლის.
მოკლედ, არასახარბიელო სიტუაციაში აღმოვჩნდით, მაგრამ ვერაფერს შევცვლით. წესებს უნდა დავემორჩილოთ.
-2020 წლის დიდი ნაწილი ყველას ჩაუვარდა. ალბათ თქვენც მათ შორის. რა ტურნირებზე შეძელით თამაში?
-ორი აზრი არ არსებობს, ყველასთვის რთული წელი იყო. შარშან შექმნილი ვითარებიდან გამომდინარე მეგონა, რომ ბევრი გამიცდებოდა, თუმცა როლან გაროსზე, ამერიკის ღია პირველობაზე, რომის და კიდევ რამდენიმე მნიშვნელოვან ტურნირზე გამოსვლა მაინც მოვახერხე. ამ მხრივ, უკმაყოფილო არ ვარ, თუმცა ზოგადად სეზონი მაინც ისეთი არ გამოვიდა, როგორიც უნდა ყოფილიყო.
სამწუხარო იყო, რომ უიმბლდონი და ზოგადად ბალახის საფარის ტურნირები ჩავარდა. იმის ფონზე, რაც მსოფლიოში ხდებოდა რამდენიმე მხვილ შეჯიბრში მაინც ვიასპარეზე. ამიტომაც, მთლად უკმაყოფილოც არ ვარ.
-ახლა როგორ სპორტულ ფორმაში ხართ?
-ახლა გამიჭირდება ზუსტად რაიმეს თქმა. ალბათ უკეთესშიც ვყოფილვარ, მაგრამ ორ კვირაში რა იქნება რთული სათქმელია. ვეცდები მელბურნში დამაჯერებლად ვიასპარეზო.
-ავსტრალიის ღია პირველობაზე ვინ იქნება თქვენი მეწყვილე?
-კოლუმბიელი ჩოგბურთელი პერეს გარსია. მას კარგად ვიცნობ და კორტზეც შეთამაშებულები ვართ. ჩვენ ერთად WTA-ს რამდენიმე სერიოზულ ტურნირზე ვითამაშეთ და საკმაოდ წარმატებითაც.
ვნახოთ რა იქნება ამჯერად. დიდი იმედი მაქვს, რომ პერეს გარსიასთან ერთად მელბურნში რაც შეიძლება შორს წავალ და მინიმუმ რამდენიმე ეტაპს გადავლახავთ.
-დამასწარით. უფრო კონკრეტულად, რა გეგმები გაქვთ მელბურნში? რა შედეგს ვარაუდობთ ან რა იქნება პროგრამა მაქსიმუმი?
-გამიჭირდება პასუხი. სპორტში და მითუფრო ჩოგბურთში პროგნოზები ძნელი გასაკეთებელია. რა თქმა უნდა, ყველა მატჩში ბოლომდე ვიბრძოლებთ. ისე კი, მნიშვნელოვანია ტრავმა რა მივიღოთ, რადგან 14 დღიანი უქმობის და კარანტინის ფონზე ორგანიზმი მოდუნებული იქნება და უცაბედმა დატვირთვამ შესაძლოა პრობლემები გამოიწვიოს.
-2021 წელს პანდემიის გამო ფედერაციის თასი არ ჩატარდება. ამან ალბათ გული დაგწყვიტათ.
-დიახ, თავისთავად. ეროვნულ ნაკრებში თამაში ჩემთვის ყოველთვის იყო და არის დიდი პატივი.
-წლეულს როგორია თქვენი სამომავლო გეგმები?
-ძალიან რთულია ამ დროს რაიმე დაგეგმო, რადგან პანდემიამ ყველაფერი შეცვალა. იმედი მაქვს, რომ გავაუმჯობესებ ჩემს რეიტინგს და ვიქნები სრულ მზადყოფნაში მომავალი ტურნირებისთვის.
