ახლახან, “დინამო თბილისის” ოქროს თაობის ფეხბურთელი და ტაშკენტის ფინალის გმირი, ილია დათუნაშვილი 84 წლის ასაკში გარდაიცვალა.
ილია დათუნაშვილზე მრავალი ლეგენდარული ისტორია არსებობს, ჩვენ კი ახლა ვეცდებით ერთ-ერთი მათგანი გავიხსენოთ.
მოდით დავიწყოთ იქიდან, რომ ბავშვობაში, როდესაც არ ვიძინებდით, მშობლები მოდიოდნენ და “გუდიანი კაცით” გვაშინებდნენ. უარეს შემთხვევაში კი ბოროტი “ბაბაიაგათი” გვემუქრებოდნენ, რომ მოგვიტაცებდა.
ქართველ ბავშვებს, სხვა გზა არ ჰქონდათ, თვალებს ხუჭავდნენ და მალევე ძილს მიეცემოდნენ.
სულ სხვანაირად აძინებდნენ პატარებს ჩვენს მეზობელ სომხეთში, წინა 60-70-იან წლებში. თუ პატარა სომეხი ბავშვი არ დაიძინებდა, ეუბნებოდნენ, რომ ილია დათუნაშვილი მივიდოდა მათთან და წაიყვანდა.
საქმე ისაა, რომ დათუნაშვილმა, 1966 წლის 22 სექტემბერს, ერევნის “არარატს” 23 წუთში 5 გოლი გაუტანა. თავად ამბობდა, რომ მეექვსეს გატანაც შეეძლო, მაგრამ თანაგუნდელმა ხელი შეუშალა – ყველა შენ ხომ არ უნდა გაიტანოო.
აღსანიშნავია, მისი პირდაპირ კუთხურიდან ჩახვეული გოლები. იმ პერიოდში, კუთხურს პენალტივით ურტყამდა, ხან ახლო ძელთან ჩაახვევდა, ხანაც შორეულ კუთხეში. ქართველ გულშემატკივარს არასდროს დაავიწყდება მის მიერ მოსკოვის “ტორპედოსთან”, ეგრედ წოდებულ “ტაშკენტის ოქროს” მატჩში გატანილი გოლები, რომელთა წყალობითაც თბილისის “დინამომ” მოსკოველები 4-1 დაამარცხა და 1964 წლის 18 ნოემბერს, ისტორიაში პირველად საბჭოთა კავშირის ჩემპიონი გახდა.
მე-20 საუკუნის 60-იან წლებში ქართველ ფეხბურთელთა თაობას “ოქროს ბიჭების” სახელით მოიხსენიებდნენ.
იმ პერიოდის “დინამო თბილისი” მსოფლიოში ერთერთი საუკეთესო გუნდი იყო, რომელმაც უძლიერესი არგენტინის ეროვნული ნაკრებიც კი დაამარცხა. აღსანიშნავია, რომ “დინამო” პირველი ევროპული გუნდი იყო, რომელმაც არგენტინაში თამაში მოიგო.
მესხი, ბარქაია, კოტრიკაძე, მეტრეველი, ხურცილავა, ჩოხელი, იამანიძე და მათ გვერდით ილია დათუნაშვილიც – ეს ის გვარებია, რომელიც აღაფრთოვანებდა იმ დროინდელ მსოფლიოს.
ილია დათუნაშვილმა ქართველ გულშემატკივარს თავი ღირსეულად დაამახსოვრა.
მან “დინამოს” მაისურით 249 ჩატარებულ შეხვედრაში 60 გოლი გაიტანა. როგორც, ზემოთ ავღნიშნეთ, დათუნაშვილი არის სსრკ- ს 1964 წლის ჩემპიონი და ორგზის პრიზიორი 1962 და 1967 წლებში. 33 საუკეთესო ფეხბურთელთა სიაში დაასახელეს ორჯერ – 1964 და 1966 წლებში.
“დინამო თბილისის” ვეტერანი ფეხბურთელი, 20 გოლით არის 1966 წლის გათამაშების ბომბარდირიც.
დინამო თბილისის” ოქროს თაობის ფეხბურთელი და ტაშკენტის ფინალის გმირი, ილია დათუნაშვილი არასოდეს დაავიწყდება ქართული ფეხბურთის გულშემატკივარს.
