აბა, ჟოან ლაპორტას და ჩავი ერნანდესის სიამტკბილობა ვინმეს რატომ ან როგორ უნდა გაუკვირდეს. ისინი ხომ იმ დიდებული „ბარსელონას“ განუყოფელი ნაწილნი იყვნენ, არც ისე დიდი ხნის წინ მსოფლიოს საკლუბო ფეხბურთს რომ აზანზარებდა.
ჩავი ერნანდესის გარეშე მაშინდელი „ბარსელონა“ წარმოუდგენელი იყო. პეპ გვარდიოლას გუნდში, ის, მესი და ინიესტა ხაზავდნენ და ხატავდნენ.
ახლა 41 წლის ჩავი ყატარშია და იქაურ ალ-სადს წრთვნის, თუმცა შესაძლოა ეს დიდხანს აღარ გაგრძელდეს. ადრეც არაერთხელ ითქვა, რომ ჩავი ერნანდესი შესაძლოა კატალონიური გრანდის მთავარ მწვრთნელად დანიშნულიყო, თუმცა ეს ამბავი ჩაიშალა და „ბარსელონა“ რონალდ კუმანს ჩააბარეს.
ჟოან ლაპორტას ხელახლა გაპრეზიდენტების შემდეგ კი როგორც ჩანს ვითარება ამ მხრივ იცვლება. ჩავი მედიასთან საუბარში არ მალავს, რომ მას და ლაპორტას ყოველდღიური თუ არა, ძალიან ხშირი კომუნიკაცია აქვთ. კი ბატონო, ისინი მეგობრები არიან, მაგრამ ვითომ მხოლოდ ამიტომ კონტაქტობენ? ამბობენ, რომ ამ ზაფხულს ლაპორტა გუნდში ჩავი ერნანდესს მოიყვანსო.
„ძალიან გამიხარდა ლაპორტას ბარსელონაში დაბრუნება. ის საუკეთესო პრეზიდენტია. მის დროს ბარსელონამ არაერთ წარმატებას მიაღწია. ჟოანთან თითქმის ყოველდღე ვსაუბრობ“ – უთხრა ჟურნალისტებს ჩავი ერნანდესმა.
ჩავის არასდროს დაუმალავს, რომ „ბარსელონას“ მთავარი მწვრთნელობა სურს. იქნებ უკვე დგება მისი დროც.
