მოახლოვდა ზაფხულიც და ალბათ არაერთ ცხელ ტრანსფერს ვიხილავთ. ინგლისში კი ყველაზე აქტუალური თემა ჰარი კეინის მომავალია.
ინგლისის ნაკრების და „ტოტენჰემის“ 27 წლის ფორვარდს ლონდონურ გუნდში დარჩენა რომ აღარ სურს ძველი ამბავია. ჰარი კეინს ჩემპიონთა ლიგაში თამაში სურს, ხოლო „ტოტენჰემმა“ მიმდინარე სეზონში ამის უფლება ვერ მოიპოვა.
კეინს ყველაზე ხშირად „მანჩესტერ სიტის“, „მანჩესტერ იუნაიტედს“ და „ჩელსის“ უკავშირებენ, თუმცა „ტოტენჰემის“ ბოსებს კატეგორიულად არ სურთ თავისი ფეხბურთელი რომელიმე კონკურენტ გუნდში გაუშვან. ამიტომაც, კეინის სანაცვლოდ ლონდონელები ასტრონომიულ თანხას – 150 მილიონ გირვანქა სტერლინგს ითხოვენ.
შეგახსნებებთ, ჰარი კეინმა მიმდინარე სეზონში „ტოტენჰემის“ რიგებში 33 მატჩი გამართა და 22 გოლი გაიტანა.
