11 ნოემბერს, საქართველოს ფეხბურთელთა ეროვნული ნაკრები მსოფლიო ჩემპიონატის საკვალიფიკაციო ეტაპზე დასკვნით შეხვედრას გამართავს. ვილი სანიოლის გუნდი ბათუმი არენაზე შვედეთის ნაკრებს დაუპირისპირდებიან.
დღეს, ჩვენი გუნდის ფრანგმა მთავარმა მწვრთნელმა სასტუმრო შერატონში სპეციალური პრესკონფერენცია გამართა და ჟურნალისტების კითხვებს ამომწურავად უპასუხა.
ფრანგი სპეციალისტმა მოახლოებულ შეხვედრაზეც ისაუბრა და განაცხადა, რომ გუნდი შვედეთის წინააღმდეგ წარმატების მოსაპოვებლად ყველაფერს გააკეთებს.
„საკმაოდ რთულია, წინასწარ მოგებაზე საუბარი, მაგრამ ამის ამბიცია არის. მთავარია, სწორი სულისკვეთება. არ მინდა წინასწარ ტაქტიკაზე საუბარი.
შვედეთის ნაკრები იბრაჰიმოვიჩთან ერთად და მის გარეშე ორი სხვადასხვა გუნდია. გვინდა, რომ შვედეთი იბრაჰიმოვიჩით ვნახოთ, ვინაიდან მიმაჩნია, რომ მას ფეხბურთისთვის დიდი საქმე აქვს გაკეთებული და შეგვიძლია ვიოცნებოთ, რომ ის კარიერას არასდროს დაასრულებს. ეს ჩვენი ფეხბურთელებისთვის კარგია, ასეთი მოთამაშეების წინააღმდეგ თამაშით ისინი იზრდებიან, ბევრს სწავლობენ და ეს მხოლოდ დადებითია. იბრა ჩვენს წინააღმდეგ იყო შვედეთში და მაშინ დაცვაში პრაქტიკულად უშეცდომოდ ვითამაშეთ და ვიმედოვნებ, რომ ასევე წარმატებით შევძლებთ მომდევნო შეხვედრაში მის წინააღმდეგ თამაშს“, – განაცხადა სანიოლმა.
