მართალია, მარტის სანაკრებო მატჩებმა ჩაიარა და უკვე ისტორიის კუთვნილებაა, მაგრამ ეროვნულ გუნდზე საუბარი და მსჯელობა გულშემატკივრისთვის ყოველთვის საინტერესოა.
მსოფლიო ჩემპიონატის საკვალიფიკაციო ეტაპის სასტარტო 3 მატჩში, ჯვაროსნებიდან ხვიჩა კვარაცხელიას გარდა თუ ვინმეს გამორჩევა შეიძლებოდა, ეს უდავოდ გურამ კაშია გახლდათ. ნაკრების გამოცდილმა ფეხბურთელმა უმაღლეს დონეზე ითამაშა და დაცვაშიც კლდესავით იდგა.
საქართველოს ნაკრების და თბილისის „ლოკომოტივის“ ფეხბურთელი საზოგადოებრივ მაუწყებელზე, გადაცემა „ტაიმაუტის“ სტუმარი იყო. მან განვლილი 3 მატჩი შეაფასა და მომავალზეც ისაუბრა.
„თამაშის იმ ხარისხიდან გამომდინარე, რაც ამ 3 მატჩში ვანახეთ, ალბათ გულშემატკივარს სამომავლოდ მეტის მოლოდინი გაუჩინა. ვფიქრობ, ამბიციების საფუძველი ნამდვილად გვაქვს. უტოპიური ნამდვილად არ არის იმაზე ფიქრი, რომ ჯგუფში რაღაც ხელშესახებ წარმატებაზე ვიფიქროთ.
საბერძნეთთან და შვედეთთან თბილისში მოედანზე აუცილებლად მოსაგებად უნდა გავიდეთ. ამის ამბიცია უნდა გვქონდეს, აღარაფერს ვამბობ კოსოვოზე. ყველა თამაში რთული იქნება, მაგრამ წარმატება შესაძლებელია და საამისოდ მაქსიმუმს გავიღებთ.
ძირითადად გრძელ პასებს ვთამაშობთ და აქედან გამომდინარე ცენტრალური თავდამსხმელზე ბევრი რამ არის დამოკიდებული. იქ ფორვარდებმა უნდა იყოჩაღონ. ძალიან რთულია მთელი მატჩის მანძილზე ყველა საჰაერო ორთაბრძოლა მოიგო.
რაც შეეხება დაცვის ხაზს, ლაშა დვალს უკვე საკმაო გამოცდილება დაუგროვდა. ჩემპიონთა ლიგაზე თამაშობს. არც ხოჭოლავა და კვირკველია უნდა დავივიწყოთ. ისინი სამომავლოდ ნაკრებს აუცილებლად გამოადგებიან.
ახალწვეულებზეც აუცილებლად უნდა ვთქვა. ჩაბრაძესაც და გიორბელიძესაც კარგი დებიუტი გამოუვიდათ.
საერთო ჯამში ყველა პოზიციაზე უდიდესი კონკურენციაა და ეს მისასალმებელია.
გუნდში უფრო მეტი ოპტიმიზმი გვჭირდება. გულშემატკივარიც ბრუნდება და შემოდგომაზეც კარგი კალენდარი გვაქვს“ – აღნიშნა გურამ კაშიამ.
