12 ნოემბერი და ჩრდ. მაკედონიასთან წაგება ქართველ გულშემატკივარს გველის ნაკბენივით ალბათ კიდევ დიდხანს ემახსოვრება. არავინ იცის, კიდევ როდის ექნება ჯვაროსნებს დიდ ფორუმზე მოხვედრის ასეთი რეალური შანსი.
საქართველოს ნაკრების ვიცე-კაპიტანმა გურამ კაშიამ, გადაცემაში „სპორტი იმედზე“ იმ მწარე მარცხზე კიდევ ერთხელ ისაუბრა.
„მაკედონიასთან თამაშის შემდეგ განადგურებულები ვიყავით. ყველას კარგად გვქონდა გათავისებული თუ რა დონის მატჩი იყო. ასეთი მნიშვნელობის თამაში კარიერის მანძილზე არ მითამაშია. სამწუხაროა, რომ მოხდა ის, რაც მოხდა.
წაგებას შეიძლება ერთი მიზეზი არ ჰქონდეს. ერთ-ერთი ალბათ ის იყო, რომ ნაკრების ფეხბურთელთა ნაწილი იმ დროისთვის სათამაშო პრაქტიკის ნაკლებობას განვიცდიდით. ეს კი ცოტას არ ნიშნავს. მატჩის წინ სხვა გაუთვალისწინებელი მოვლენებიც მოხდა. ალბათ უიღბლობაც იყო, რადგან თუ მატჩის პერიპეტიებს გავიხსენებთ მეტოქეს მხოლოდ ერთი შანსი ჰქონდა და ისიც გამოიყენა.
რა თქმა უნდა, გული მწყდება, რომ ეს ისტორიული შანსი ხელიდან გავუშვით. მაკედონიასთან წაგება ჩვენი ყველას ტკივილია.
რაც შეეხება ნაკრებში ჩემს მომავალს, გამოგიტყდებით და ეროვნულ გუნდში თამაში ისევ მსურს.“ – აღნიშნავს გურამ კაშია.
