გიორგი ჩაკვეტაძე ზედიზედ მეორე მატჩია გენტის სასტარტო შემადგენლობაში ხვდება. ბელგიის ჩემპიონატის მე-9 ტურში, სერკლ ბრიუგესთან საშინაო შეხვედრაში გიორგიმ მოედანზე 78-ე წუთამდე დაჰყო, მეორე ტაიმში საგოლე გადაცემა შეასრულა და გუნდის რთულ გამარჯვებაში თავისი წვლილი შეიტანა.
ქართველი ფეხბურთელი რომელიც მატჩის საუკეთესო ფეხბურთელადაც დაასახელეს, ბელგიურ მედიასთან კომენტარი გააკეთა.
“განსაკუთრებით მახარებს ის, რომ შემიძლია გუნდისთვის მნიშვნელოვანი მოთამაშე ვიყო. იოლი თამაში არ გამოგვივიდა და ამ გამარჯვების მოსაპოვებლად დიდი სამუშაო გავწიეთ.
რა თქმა უნდა, ტრავმებთან ხანგრძლივ ბრძოლას უკვალოდ არ ჩაუვლია და თავს ასი პროცენტით მზად ჯერ კიდევ ვერ ვგრძნობ. 60-70 წუთის შემდეგ ფეხებში სიმძიმეს ვგრძნობ და შეცვლაც ამიტომ მოვითხოვე. ზოგჯერ ისევ მეუფლება ტრავმის მიღების შიში და ეს ბუნებრივია, როდესაც ამდენი ხანი გამიცდა. მოედნიდან გასვლამდე ძლიერი დარტყმა კი მივიღე, მაგრამ საბედნიეროდ, სერიოზული არაფერია”, – ამბობს გიორგი.
“გენტი” მომდევნო მატჩს 30 სექტემბერს, კონფერენსლიგის ჯგუფში, კვიპროსული “ანორთოსისის” წინააღმდეგ გამართავს, ბელგიის ჩემპიონატში კი 3 ოქტომბერს, “ანტერვპენს” ესტუმრება.
