ქართველ სპორტსმენთაგან, 2020 წელი თუ ვინმესთვის ცუდი და უიღბლო იყო, პირველ რიგში ალბათ ნიკოლოზ ბასილაშვილისთვის. ქართველი ჩოგბურთელი საკუთარ თავს აშკარად არ ჰგავდა. გაზაფხულზე პანდემიის გამო შეწყვეტილი სეზონის განახლებიდან, ბასილაშვილმა სადაც ითამაშა, ყველა ტურნირზე ხელი მოეცარა. თან წაგებაცაა და წაგებაც, ჩვენებური მეჩოგნე ყველა მეტოქესთან უშანსოდ და სეტმოუგებლად აგებდა. ბუნებრივია, ამ ფაქტორმა რეიტინგზეც საგრძნობლად იმოქმედა და ბასილაშვილიც დაქვეითდა. ამჟამად ის მსოფლიოს მე-40 ჩოგანია.
2020 წელი წარსულს ჩაბარდა და იმედია ახალი სეზონი ნიკოლოზ ბასილაშვილისთვის წარმატებული გამოდგება. პირველი ტურნირი კი მას 7 იანვარს ანტალიაში ელის, სადაც 250-ინი კატეგორიის შეჯიბრი აიღებს სტარტს.
ტურნირის საკმაოდ წარმომადგენლობითია, წილისწყრის შედეგად კი ქართველი ჩოგბურთელის პირველი მეტოქე ანდრეა არნაბოლდი იქნება. იტალიელი ჩოგბურთელი 33 წლის გახლავთ და კარიერის საუკეთესო პერიოდი ჩავლილი აქვს, თუმცა არც მანამდე ბრწყინავდა, რაზეც ისიც მეტყველებს, რომ მას ATP-ის არცერთი ტურნირი არ მოუგია და ამჟამად 267-ე ჩოგანია.
ნიკოლოზ ბასილაშილი და ანდრეა არნაბოლდი აქამდე კორტზე არასოდეს შეხვედრიან და იმედია ურთერთშეხვედრებშიც ჩვენებური დაწინაურდება.
ქართველი და იტალიელი ჩოგბურთელების დაპირისპირება 7 იანვარს გაიმართება.
