21-ე საუკუნეში, პირადი კადრების გადაღება და შემდეგ უჩუმრად გავრცელება რატომღაც მოდურ საქციელად იქცა. მსგავსი ქმედება ნებისმიერი პროფესიის წარმომადგენლისგან უადგილო და მიუღებელია, მაგრამ ბოლო დროს სპორტსმენებშიც მსგავს ფაქტებს ადგილი არცთუ ისე იშვიათად აქვს.
ქარიმ ბენზემა თემა უკვე კარგად გადაღეჭილია. ფრანგ ფეხბურთელს პირადი კადრებით შანტაჟის გამო შესაძლოა 5 წელი გისოსებს მიღმა ყოფნა მოუხდეს, სერხი ენრიჩი კი სასამართლომ უკვე დამნაშავედ სცნო.
ესპანელი ფეხბურთელი, რომელიც „ეიბარის“ ღირსებას იცავს და საკმაოდ წარმატებითაც, მართლაც რომ შეუფერებლად მოიქცა. ენრიჩს და მის ყოფილ თანაგუნდელს, ბრალად მესამე პირის პირადი კადრების უკანონოდ გავრცელება ედებათ. სასამართლომ ფეხბურთელებს 2 წლიანი პირობითი მსჯავრი დააკისრა. ამბავი კი 2016 წელს მოხდა, თუმცა განაჩენი ახლა დადგა.
მომჩივანი ახალგაზრდა გოგოა. სწორედ მას გაუვრცელეს კადრები ფეხბურთელებმა, სადაც თავადაც ჩანან. გოგონა აღნიშნავს, რომ ამ ფაქტის შემდეგ მას ფსიქოლოგიური პრობლემები შეექმნა და სპეციალური გამოსაჯანმრთელებელი კურსის გავლა დასჭირდა.
ჯერჯერობით, „ეიბარის“ ხელმძღვანელობა ოფიციალური განცხადების გავრცელებისგან თავს იკავებს. სერხი ენრიჩი გუნდში 2015 წლიდან თამაშობს და ამ ხნის მანძილზე 37 გოლი გაიტანა.
