ქართული გუნდებისთვის ევროსეზონი რა ხანია დასრულებულია. სამწუხაროდ, ამას უკვე შევეჩვიეთ და გულის მოსაფხანად ისღა გვრჩება, ჩემპიონთა თუ ევროპა ლიგის ჯგუფურ ეტაპზე კანტი-კუნტად მყოფ ჩვენ ლეგიონერებს ვუქომაგოთ.
სამწუხაროდ, ისეთი პირი უჩანს, რომ მიმდინარე სეზონში საგულშემატკივრო ამ მხრივაც ბევრი არაფერი გვექნება. ევროპა ლიგის გათამაშების ჯგუფური ეტაპი ვერ გადალახეს და უკვე გამოეთიშნენ ნიკა კაჭარავას პოლონური „ლეხი“, ნიკა ნინუს ბერძნული „პაოკი“ და გიორგი ჩაკვეტაძეს ბელგიური „გენტი“.
ცუდია, რომ ქართველმა ახალგაზრდა და ნიჭიერმა ტალანტმა გიორგი ჩაკვეტაძემ „გენტის“ დახმარება ვერ შეძლო და მისმა გუნდმაც მთელი ჯგუფური სტადია მის გარეშე ითამაშა. შედეგიც სახეზეა – ბელგიურმა გუნდმა ზედიზედ 5 მატჩი წააგო და ევროსეზონის ცხრილის ფსკერზე დაასრულა. შეგახსენებთ, ჩაკვეტაძემ მძიმე ტრავმა ჩემპიონთა ლიგის საკვალიფიკაციო ეტაპზე „რაპიდთან“ დაპირისპირების დროს მიიღო, რამაც მას სანაკრებო ბატალიებიც გამოატოვებინა, თორემ ვინ იცის, იქნებ ჯვაროსნებს ევროპის ჩემპიონატის საგზურიც მოეპოვებინათ.
რაც შეეხება ნინუს „პაოკს“, ბერძნებმა „პსვ“-ს, „გრანადას“ და „ომონიას“ კომპანიაში 6 ქულით მესამე ადგილი დაიკავეს. სამწუხაროდ, ქართველი ფეხბურთელი „პაოკის“ რიგებში იშვიათად ჩნდებოდა, ხოლო ბოლო ტურში „გრანადასთან“ მატჩში, რომელიც 0:0 დასრულდა მოედანზე არ გამოჩენილა.
კახა კაჭარავას „ლეხმა“ კი ბოლო ტურში გლაზგოს რეინჯერსთან შინ 0:2 წააგო და 3 ქულით ჯგუფშ ბოლო ადგილზე დარჩა. ქართველ ფეხბურთელს მცირე ტრავმა აწუხებს და პოლონური გუნდის რიგებში ამიტომაც არ უთამაშია.
