ლეგენდარულმა იტალიელმა მეკარემ, დინო ძოფმა ჯანლუიჯი დონარუმას შესახებ ისაუბრა, რომელმაც „მილანიდან“ „პარიზ სენ-ჟერმენში“ გადასვლა გადაწყვიტა. ძოფი მიიჩნევს, რომ 22 წლის ასაკში ფინანსური საკითხი მთავარი არ უნდა იყოს.
„ის დიდი მეკარეობის გზაზეა. მე არ ვაფასებ მის არჩევანს, მაგრამ რა იცვლება პსჟ-ში გადასვლით, როცა უკვე ისეთ გუნდში თამაშობ, როგორიც „მილანია“? ალბათ, ცოტათი უფრო მეტ ფულს გამოიმუშავებს, მაგრამ 22 წლის ასაკში არ მგონია, რომ ფული ყველაზე მნიშვნელოვანი იყოს“, – თქვა ძოფმა.
შეგახსენებთ, რომ ჯანლუიჯი დონარუმას „მილანში“ დებიუტი 2015 წელს ჰქონდა და 251 თამაში ჩაატარა. ის პსჟ-სთან კონტრაქტს სავარაუდოდ უახლოეს დღეებში გააფორმებს.
