დინამო თბილისმა ჩემპიონთა ლიგის პირველ საკვალიფიკაციო ეტაპზევე დაასრულა. კახა ცხადაძის გუნდმა ნეფთჩისთან ბაქოშიც ისევე წააგო, როგორც თბილისში 1:2.
პირველი ნახევარი საათი დინამო ძირითადად თავს იცავდა. განსაკუთრებით სახიფათო ნეფთჩის ფორვარდი ნამიკ ალესკეროვი იყო. მოგვიანებით თბილისელები გააქტიურდნენ და დინამო უშანსოდ არ ყოფილა. შესვენებამდე გატანა გიორგი გაბედავას თავური დარტყმით ორჯერ შეეძლო.
მეორე ტაიმი დინამო თბილისმა კიდევ უფრო აქტიურად დაიწყო და მიზანსაც მიაღწია. ანგარიში მილან რადინმა მას შემდეგ გახსნა, რაც ჯერ ლევან ხარაბაძემ მოარტყა ბურთი ხარიხას, შემდეგ კი გიორგი კუციამ.საბოლოოდ იერიში დინამოელთა რადინმა გოლით დააგვირგვინა – 0:1.
სამწუხაროდ, დინამომ გოლები მალევე გაუშვა. პირველ ჯერზე ეს როინ კვასხვაძის უხეშ შეცდომას მოჰყვა და თბილისელთა კარში თერთმეტმეტრიანი დაინიშნა. კვასხვაძემ ემინ მაჰმუდოვს კუთხე კი გამოუცნო, მაგრამ ბურთს ვერ შესწვდა – 1:1.
მალევე თბილისელთა დაცვამ ვერაფერი გააწყო და ნეფთჩი – 2:1 დაწინაურდა.
დინამო ევროპის მთავარ საკლუბო ტურნირში ზედიზედ მეექვსედ დამარცხდა.კახა ცხადაძის გუნდი კონფერენს ლიგაზე გადაერთვება, მეტოქედ ჰაიფას მაქაბი ეყოლება. ცხადაძის გუნდი მაქაბის 22 ივლისს შინ, ხოლო 29 ივლისს სტუმრად ეთამაშება.
