ბათუმის “დინამო” დავით ყიფიანის სახელობის საქართველოს თასის ნახევარფინალში ითამაშებს. აჭარულმს კლუბმა 1/4-ფინალში თბილისის “ლოკომოტივი” 3:1 დაამარცხა.
შეხვედრა ბათუმელთა უპირატესობით დაიწყო და ანგარიში მე-15 წუთზე ჯაბა ჯიღაურმა გახსნა. მე-20 წუთზე გია გეგუჩაძის გუნდმა სხვაობა გაზარდა. თბილისელთა დაცვამ არადამაჯერებლად ითამაშა და ალთუნაშვილის პასით გიორგი ფანცულაიამ გაიტანა.
ბათუმელებმა უპირატესობა ვერ შეინარჩუნეს. 34-ე წუთზე ოლეკსანდრ აზაცკის შეცდომით თორნიკე კირკიტაძემ ისარგებლა, რომელმაც მეკარესთან პირისპირ ზუსტად დაარტყა და სხვაობა შეამცირა. თაში დაიძაბა, მაგრამ “დინამოს” მეკარე ლაზარე კუპატაძე შესანიშნავად თამაშობდა.
მე-2 ტაიმი ისევ ბათუმის “დინამოს”უპირატესობით დაიწყო. 54-ე წუთზე ვლადიმერ მამუჩაშვილმა საჯარიმოს გარედან ეფექტური გოლი გაიტანა და მატჩის საბოლოო ანგარიში დააფიქსირა. განსაკუთრებით მეორე ნახევარში დინამო ბათუმი საგრძნობ უპირატესობას ფლობდა და დამსახურებული გამარჯვებაც მოიპოვა. ამგვარად გია გეგუჩაძის გუნდი საქართველოს თასზე ასპარეზობას აგრძელებს.
