დღესდღეობით, რაგბში შექმნილი რთული ვითარება არა მხოლოდ სპორტის ამ სახეობის, არამედ ვფიქრობთ ზოგადად ქართული სპორტის ქომაგებს აწუხებს. კრიზი ჩიხშია შესული და შავი ბურუსით არის მოცული.
რაგბი ქართველი გულშემატკივრისთვის მუდამ ერთიანობასთან ასოცირდებოდა, მაგრამ ახლა რადიკალურად საპირისპირო სურათს ვხედავთ. რაგბის კავშირის პრეზიდენტის სავარძლისთვის ბრძოლა წელიწადზე მეტია მიმდინარეობს და დაპირისპირებაც სულ უფრო ღვივდება.
„პრაიმსპორტი“ ვეტერან მორაგბეს და ქუთაისის „აიას“ ახალგაზრდული გუნდის მწვრთნელს დიმიტრი ფულარიას შეეხმიანა და შექმნილ ვითარება შეაფასებინა.
-არა მგონია ეს სიტუაცია ვინმეს არ ადარდებდეს, განსაკუთრებით რაგბის სამყაროში. ძალიან ვწუხვარ რომ მხარეებად დაყოფა მოხდა. არასდროს მომწონდა, როდესაც ამა თუ იმ დარგში ასეთი რამ ხდებოდა და ადამიანები დაჯგუფებებად იყოფოდნენ.
მხარე არ უნდა არსებობდეს. ამან ჩვენ ქვეყანას კარგი არაფერი მოუტანა. უნდა იყოს ერთი მხარე – რაგბის სიყვარულის, განვითარების და წინსვლის მხარე. თუ გაერთიანებაა, ამისთვის ღირს ერთ მუშტად შეკვრა, როგორც ადრე იყო და იმედი მაქვს მომავალშიც გაგრძელდება.
ძალიან მიკვირს, ერთმანეთთან კომუნიკაცია არ აქვთ, არ ელაპარაკებიან თუ რა ხდება? ამდენი შეურაცხყოფა ერთმანეთის მისამართით მისაღები და ლამაზი საყურებელი როგორ შეიძლება იყოს? ეს ყველაფერი ჩემზე ძალიან მოქმედებს.
–გამოსავალს რაში ხედავთ?
-არჩევნების კუთხით იურიდიულ განხილვაში ვერ შევალ. საფუძვლიანად ვერ ვერკვევი და დეტალურად ვერ ვიმსჯელებ. რაც ვიცი არის ის, რომ ყველამ სიტუაციის დალაგებაზე და გაუმჯობესებაზე უნდა იზრუნოს. ამოსავალი წერტილი ეს უნდა იყოს. ასე დიდხანს გაგრძელება დაუშვებელია. რაღაცნაირად ეს მხარეები უნდა შეჯერდნენ და საერთო საქმისთვის გაერთიანდნენ.
„შევაკვდებით“, „არ დავთმობთ“ და მსგავსი გამონათქვამები გვესმის. რა საჭიროა ეს ყველაფერი არ მესმის. იმასაც ხომ უნდა შეხედონ აქამდე როგორ მოვედით, ქართულ რაგბს რა ტრადიციები და წარსული ჰქონდა. ამიტომ, კიდევ ერთხელ გავიმეორებ, რომ დაპირისპირება უნდა შეწყდეს. მხოლოდ ეს არგებს რაგბს და არა ჩხუბი და დავიდარაბა.
