ცოდო ის არის ვინც მოკვდება, თორემ ცოცხლებს ყოველთვის რაღაც ეშველებაო. სრული ჭეშმარიტებაა და ამ გამოთქმის სისწორეში ეჭვს ვერავინ შეიტანს, რაც დიეგო მარადონას გარდაცვალების შემდეგ განვითარებულმა მოვლენებმა კიდევ უფრო ცხადყო.
რა თქმა უნდა, დიადი ათიანის მოულოდნელმა გარდაცვალებამ, სრულიად მსოფლიო შოკში ჩააგდო. ფეხბურთის ღმერთი, განურჩევლად პროფესიისა თუ ფეხბურთისადმი ინდეფერენტული დამოკიდებულებისა, მილიონობით ადამიანმა გულწრფელად დაიტირა. იყო ბევრი ცრემლი და არაერთი ღირსეული ნაბიჯი – თუნდაც ნეაპოლის მუნიციპალიტეტის გადაწყვეტილება რად ღირს, როდესაც ქალაქის საფეხბურთო სტადიონი დიეგო მარადონას სახელობის გახადეს.
მოვიდა მარადონას ქონების განაწილების დროც და აქ უკვე მონასტერი აირია. დიეგოს ქონება 37 მილიონ ფუნტ სტერლინგად არის შეფასებული. ნამდვილად მსუყე ლუკმაა და მის ხელში ჩასაგდებადაც დიდი ბრძოლა გაჩარდა.
პოპულარული ბრიტანული გამოცემის The Sun-ის ცნობით, მარადონას ქონებაზე პრეტენზიას ერთბაშად 16 ადამიანი აცხადებს. აქედან 7 უკანონო, 5 კანონიერი შვილი და 4 და.
ასეთ დროს, მარტივი გამოსავალი ანდერძია, თუმცა ის აღარ არსებობს. მარადონამ, 2012 წელს, ანდერძი კი შეადგინა, მაგრამ შემდეგ რატომღაც მისი გაუქმება გადაწყვიტა და მისი ქონებაც, გარდაცვალების შემდეგ ასე ჰაერში გამოეკიდა.
არგენტინული ჯანონმდებლობის მიხედვით, ქონების მიღების პირველი მემკვიდრეები შვილები არიან და ის ყველამ თანაბრად უნდა გაიყოს, მაგრამ საქმეს ის ართულებს, რომ კანონიერ შვილებს მეტი პრეტენზია აქვთ. დიდი ალბათბით ყველა ადვოკატს აიყვანს და დავა სასამართლოში გაგრძელდება.
დიეგო მარადონას, ფინანსური აქტივები ბუენოს-აირესში, შვეიცარიაში და დუბაიში ჰქონდა შენახული.
