17 წლის იყო, პირველად დიდი სლემის ტურნირი რომ მოიგო, ჯამში კი 5 მეიჯორს მოუყარა თავი. მარია შარაპოვა საჩოგბურთო სამყაროში მართლაც შურდულივით შემოიჭრა და თავისი ნიშა დაიმკვიდრა.
რუსი ლამაზმანი ყურადღების ცენტრში არა მხოლოდ ჩოგნის ქნევის, არამედ მისი ფიზიკური მონაცემების გამოც არაერთხელ მოქცეულა. მარიას გულის მოგებას ვინ არ ცდილობდა. ვიღაცას გაუმართლა, ვიღაცას არა.
შარაპოვა ჩოაგბურთიდან წავიდა და ცხოვრების ახალ ეტაპზე გადავიდა. ბრიტანელ ბიზნესმენთან მისი ნიშნობის ამბავი პრესას ელვის სისწრაფით მოედო. ბუნებრივია, სამეფო სპორტი შარაპოვას განუყოფელი ნაწილი იყო და მიუხედავად კარიერის დასრულებისა, საჩოგბურთო მოგონებების გახსენება ალბათ ბევრჯერ მოუწევს.
„2004 წელი და უიმბლდონის ფინალი ჩემი მეხსიერებიდან არასოდეს წაიშლება. ის ყველაზე ბედნიერი დღე იყო ჩემ კარიერაში. 17 წლის ასაკში დიდი სლემის ტურნირის ჩემპიონი გავხდი. მონსტრ სერენა უილიამსს ვაჯობე.
ფინალს დედამ ვერ ჩამოუსწრო. იმ დროს თვითმფრინავში იყო და ლონდონისკენ მოემართებოდა. ეს ის პერიოდია, როდესაც თვითმფრინავებში ალაგ-ალაგ პატარა ტელევიზორები გაჩნდა. დედამაც ჩემ თამაშს და გაჩემპიონებას 10 კილომეტრის სიმაღლიდან უყურა.
მახსოვს, მატჩის შემდეგ ტრიბუნებისკენ გავიქეცი, მამას ჩავეხუტე, შემდეგ ჩანთიდან ტელეფონი ამოვიღე და უმალ დედას დავურეკე, მაგრამ ის სულ აღარ მახსოვდა, რომ ჯერ კიდევ თვითმფრინავში იყო“ – იხსენებს მარია შარაპოვა.
