მიჯრით ხუთი გამარჯვება და მსოფლიოს ჩემპიონატის ფინალი. 21 წილს ტატო გრიგალაშვილმა (81კგ), ბუდაპეშტში, ძიუდოში მიმდინარე მსოფლიოს ჩემპიონატზე ტრიუმფამდე სულ ცოტა დააკლდა, თუმცა ქართულ ყულაბაში ვერცხლის სახით მეორე მედალი კი ჩააჩხრიალა.
ახალგაზრდა და ნიჭიერმა ქართველმა ძიუდოისტმა ფინალამდე კორეელი ლი მუნი, შვედი რობინ პასეკი, ბერძენი ალექსიოს ტანატიდისი, ბელგიელი სამი კოუჩი, ნახევარფინალში ნიდერლანდელი ფრანკ დე ვიტი დაამარცხა და კვარლცხბეკის უმაღლეს საფეხურს მიუახლოვდა,. თუმცა ფინალში დასანანად დამარცხდა.
გადამწყვეტ ბრძოლაში გრიგალაშვილს კიდევ ერთი ბელგიელი მატიას კასე ელოდა. ორთაბრძოლა ფინალის შესაფერისად დაძაბული გამოდგა და გამარჯვებული ძირითად დროში ვერ გამოვლინდა. ორივე ძიუდოისტი საკმაოდ ფრთხილობდა, თუმცა გრიგალაშვილი ხშირად რისკავდა და შეტევაზე გადადიოდა. დამატებით დროში, გამარჯვებული „ოქროს ქულამ“ გამოავლინა. ჩვენდა სამწუხაროდ, აქ ბელგიელ ძიუდოისტს გაუმართლა და ჩვენებური ბეჭებზე დააგდო.
ძიუდოის მოყვარულთ ალბათ შეხსენება არ სჭირდებათ, რომ ტატო გრიგალაშვილი 2020 წლის ევროპის ჩემპიონია, ხოლო წლეულს იანვარში დოჰას უპრესტიჟულესი მასტერსი მოიგო. ახლა კი, ქართველმა ძიუდოისტმა თავის კოლექციას მსოფლიოს ჩემპიონის ვერცხლიც შეჰმატა.
ამრიგად, უნგრეთის დედაქალაქში გაშლილ ტატამზე, 3 საშეჯიბრო დღის შემდეგ საქართველოს ნაკრების ანგარიშზე უკვე ორი მედალია. გუშინ, ლაშა შავდათუაშვილის დიდებული ასპარეზობის და ჩემპიონობის შემდეგ, ტატო გრიგალაშვილმა ვერცხლი დაისაკუთრა.
