ევროპის სუპერლიგის შექმნა საყოველთაო განხილვის საგანი კიდევ დიდხანს იქნება. პროექტი უკვე დატოვეს ინგლისურმა კლუბებმა.
პრემიერლიგის გუნდების ნაწილმა ამ ქმედებისთვის ბოდიში მოიხადა, ერთ-ერთი პირველი კი „არსენალი“ იყო.
იგივე გააკეთა „ლივერპულმაც“. მერსისაიდელთა მფლობელმა ჯონ ჰენრიმ სინანული გამოთქვა და შემდეგი სახის განცხადება გაავრცელა.
„გულშემატკივრებისგან მალულად ამ ნაბიჯის გადადგმა არ შეიძლებოდა. სამწუხაროდ, მათზე არავინ იფიქრა. ამიტომაც, პირველ რიგში სწორედ ჩვენ ქომაგებს გვინდა ბოდიში მოვუხადოთ იმ გაუგებრობისთვის, რაც ბოლო დღეებში მოხდა.
„ლივერპულში“ პროფესიონალი და თავის საქმეზე შეყვარებული ადამიანები მუშაობენ. მსურს, მთავარ მწვრთნელ იურგენ კლოპს და თითოეულ ფეხბურთელსაც მოვუბოდიშო. ისინი მაქსიმუმს აკეთებენ, რათა „ლივერპული“ მსოფლიოში საუკეთესო და პოპულარული გუნდი იყოს.
იმ დროიდან მოყოლებული, რაც გუნდში მოვედი, ზუსტად იმაზე ვოცნებობდი, რაზეც თქვენ. მინდოდა კლუბი უკეთესობისკენ შემეცვალა. კიდევ ერთხელ ბოდიშს გიხდით. იმ არეულობაში, რაც ბოლო დღეებში ხდება, დამნაშავე მხოლოდ მე ვარ“ – ამბობს მერსისაიდული გუნდის მფლობელი.
