აზერბაიჯანის დედაქალაქ ბაქოში გამართულ ძიუდისტთა გრან სლემზე საქართველოს ნაკრებმა 1 ოქროს და 3 ბრინჯაოს მედალი მოიპოვა. ჩემპიონი 60 კილოგრამ წონით კატეგორიაში მოასპარეზე ჯაბა პაპინაშვილი გახდა.
ჯაბა ტიტულოვანი ქართველი ძიუდოისტის, ამირან პაპინაშვილის ძმაა, 23 წლის ძიუდოისტი 2017 წლის ზაგრების ახალგაზრდული მსოფლიოს ჩემპიონატის გამარჯვებულია. ჯაბა პაპინაშვილის ოცნება ოლიმპიური ჩემპიონობაა და ის ამ მიზნისთვის ძალიან ბევრს ვარჯიშობს.
„პრაიმ სპორტი“ ჯაბა პაპინაშვილს დაუკავშირდა და მასთან მცირე ინტერვიუ ჩაწერა:
– დიდხნიანი პაუზის შემდეგ, დიდ ძიუდოს ოქროს მედლით დაუბრუნდი, როგორ შეაფასებდი შენს გამოსვლას ბაქოს გრან სლემზე?
– დიახ, დიდი ხანი მომიწია პაუზის აღება, რადგან თბილისის გრან სლემის წინ კორონავირუსი დამიდასტურდა და ამის შემდეგ არაერთი პრობლემა შემექმნა, მაგრამ ორი თვის წინ დავიწყეთ მომზადება, ამაში ჩემი ძმა დამეხმარა და ასე თუ ისე, ფორმაში შევედი. შესაბამისად, ამ შედეგით კმაყოფილი ვარ.
– შემართებით იყავი?
– შემართება საბრძოლო იყო. საჩემპიონოდ ვიყავი წასული, რაც გამომივიდა კიდეც.
– როგორ შეაფასებდი ჩვენი ნაკრების გამოსვლას ბაქოს გრან სლემზე?
– მოგეხსენებათ, ნაკრები სრული შემადგენლობით არ წასულა და ბევრმა ძლიერმა სპორტსმენმა დაისვენა, მაგრამ ამ შემადგენლობით ძალიან ნორმალური შედეგი დავდეთ.
– ვის უძღვნი ამ გამარჯვებას?
– ჩემს შვილს ვუძღვნი, იმიტომ რომ რაც დაიბადა პირველ ტურნირზე ვიჭიდავე და გავიმარჯვე, შესაძლოა დაემთხვა, მაგრამ იღბლიანი ფეხი ნამდვილად შემოიტანა.
– შენთვის მისაბაძი ძიუდოისტი?
– რა თქმა უნდა ჩემი ძმა.
– არის თუ არა დამატებითი სტიმული ისეთი ლეგენდარული ძიუდოისტის ძმა იყო, როგორიც ამირან პაპინაშვილია?
– რა თქმა უნდა სტიმულს მაძლევს. ამჟამად ამირანი მამზადებს, მწვრთნელობას მიწევს და ვემზადებით დიდი ტურნირებისთვის.
– რა არის შენი ოცნება?
– რა თქმა უნდა, ყველა სპორტსმენის და ძიუდოისტის ოცნება ოლიმპიური ჩემპიონობაა. არც მე ვარ გამონაკლისი.
– რას ეტყოდი ახალგაზრდებს?
– ახალგაზრდებს იმას ვეტყვი, რომ თავდაუზოგავად ბევრი ივარჯიშონ და იშრომონ, რომ დიდ წარმატებას მიაღწიონ.
