ჩემპიონი ათასიანთა კლუბში – ვერონას ახალი ისტორია

ამა თუ იმ გუნდს კი არა, 1000 გოლი რამდენიმე კონკრეტულ ფეხბურთელსაც გაუტანია, მაგრამ შედარებით პატარა კლუბებისთვის ესეც ისტორიული შედეგია.

სერია ა-ს 22-ე ტურში „ვერონამ“ საკუთარ მოედანზე ერთ დროს ყოჩაღ და ყველასათვის ანგარიშგასაწევ „პარმას“ უმასპინძლა და 2:1 დაამარცხა. ვერონელებისთვის გამარჯვება და მოპოვებული 3 ქულა თავისთავად მნიშვნელოვანი გახლდათ, მაგრამ ამ მატჩში მათთვის კიდევ ერთი საგულისხმო ფაქტი დაფიქსირდა.

სტატისტიკოსებმა დაადგინეს, რომ „ვერონა“ ათასიანთა კლუბის წევრი გახდა. უფრო გასაგებად რომ ავხსნათ, გუნდმა იტალიის ჩემპიონატში უკვე 1000 გატანილ გოლს მოუყარა თავი. ამ მაჩვენებლით „ვერონა“ გახდა მე-19 გუნდი, რომელმაც სერია ა-ში მინიმუმ 1000 გოლის გატანა შეძლო.

ისე, ერთ დროს „ვერონა“ იტალიის ჩემპიონიც კი იყო. გუნდმა ამ ისტორიულ შედეგს 1984/85 წლების სეზონში მიაღწია.