კლუბის სპორტული დირექტორის პოსტზე ალექსანდრე რეხვიაშვილი თბილისის “დინამოს” მფლობელმა, რომან ფიფიამ წარადგინა.
‘’მე დაახლოებით ორი წლის წინ ზაზა დოლიძესთან გავდიოდი ამ თემებს, რომ მმართველი გუნდის რეორგანიზაცია გაგვეკეთებინა, თუმცა შემდეგ პანდემია დაიწყო. ამიტომ, დღეს მინდა გაცნობოთ, რომ სპორტული დირექტორი ალექსანდრე რეხვიაშვილი იქნება.
მომავალი ორი წელი გუნდს კახა ცხადაძე უხელმძღვანელებს, სპორტული მიმართულება კი მთლიანად ალექსანდრე რეხვიაშვილმა ჩაიბარა. ვგულისხმობ როგორც აკადემიას, ასევე, პირველ გუნდს. ალექსანდრე რეხვიაშვილს ზურგს უმაგრებს ბელარუსიაში გაწეული საქმიანობა.
ახლო მომავალში ზაზა დოლიძე ბიზნეს მიმართულებს წარადგენს. ‘’დინამოს’’ აქვს ძალიან დიდი პოტენციალი. ასევე, ჩვენ გვეყოლება ფინანსური დირექტორი. ‘’დინამოს’’ უნდა მართავდეს ბორდი. ჩვენ გადავწყვიტეთ ამის კეთება. ბევრი კითხვები იყო, რომ გუნდი არასწორად იმართება.
ბევრი გვაკრიტიკებდა, თუმცა არიან ჟურნალისტები, რომლებიც არაკეთილსინდისიერად ავრცელებენ ინფორმაციას. ‘’დინამოს’’ აკადემიამ თქვა თავისი სიტყვა. ამ ბოლო 10 წლის განმავლობაში ორი ასეთი დიდი პროფესიონალი დინამოში არ ყოფილა. ვგულისხმობ, კახა ცხადაძესა და ალექსანდრე რეხვიაშვილს.
მინდა ხაზგასმით აღვნიშნო, რომ 10 წლის განმავლობაში არც ერთ მწვრთნელზე არ მიმიცია შენიშვნა. რამდენიმე ფეხბურთელმა შეიწირა ჩვენი ევროტურნირები, თუმცა ეს ფეხბურთელები წინა მწვრთნელების მოყვანილი იყო”. – განაცხადა რომან ფიფიამ
მედიასთან ახალმა სპორტულმა დირექტორმა ალექსანდრე რეხვიაშვილმაც ისაუბრა:
“რაც შეეხება სპორტულ მიმართულებას, კონკრეტულ თემებს არ შევეხები, ამას დრო აჩვენებს. ჩვენი მიზანია ‘’დინამო’’ გახდეს ბიზნეს პროექტი. ის პოტენციალი, რაც მე ვნახე დინამოში, ეს ძალიან სასიხარულო რამეა. აქცენტს ჩვენს აღზრდილებზე გავაკეთებთ. ერთი რაშიც გაგვიმართლა, მიმუშავია კახა ცხადაძესთან და ვიცი, როგორი მომთხოვნია ახალგაზრდა ფეხბურთელების მიმართ და ასევე ვიცი როგორი ურთიერთობა აქვს მათთან.
საქართველოში დიდი პოტენციალია ტალანტების. საქართველო ახლაც ტალანტების სამჭედლოა. ისინი უნდა გაძლიერდნენ მენატლურად, ფიზიკურად, რომ სტერსული სიტუაციებისთვის მზად იყვნენ. თუ ჩვენ ჩავუდექით ამ საქმეს, ესეიგი ჩვენ ბევრი რამ გადავდეთ პირადი. აქ დალაგებული პროექტიდან მოვედი. ეს მიზანი, ეს პროექტი ძალიან დიდი გამოწვევაა. ამიტომ მე მზად ვარ”.- განაცხადა ალექსანდრე რეხვიაშვილმა
