რაგბი ევროპის ჩემპიონატის დასკვნით მატჩში საქართველოს მორაგბეთა ეროვნული ნაკრები მიხეილ მესხის სახელობის სტადიონზე რუმინეთის ნაკრებს შეხვდა.
შეხვედრა აიმით იყო გამორჩეული, რომ თითქმის ორწლიანი პაუზის შემდეგ რაგბის გულშემატკივრები მოედანზე დაბრუნდა და დაახლოებით 8 ათასი ქომაგი ბორჯღალოსნებს ტრიბუნიდან გულშემატკივრობდა.
უშუალოდ თამაშს რაც შეეხება ქართველი მორაგბეებისთვის საკმაოდ რთული გამოდგა. ბორჯღალოსნებმა შეხვედრა ატიურად დაიწყეს და მე-10 წუთზე მეტოქის ნახევარზე ტექნიკური ლელოც დადეს, რომელიც აბჟანდაძემ ზუსტად გარდასახა.
ამას მოყვა თედო აბჟანდაძის მიერ კიდევ ერთი ზუსტად შესრულებული გასროლა და ბორჯღალოსნები შეხვედრაში 10:0 დაწინაურდნენ.
ზუსტად 1 წუთში შეიძლება ითქვას, რომ შეხვედრის ყველაზე უსიამოვნო ეპიზოდი დადგა. მეტოქის არასწორად შებოჭვის გამო, მატჩის პორტუგალიელმა არბიტრმა საქართველოს ნაკრების პირველხაზელი შალვა მამუკაშვილი მოედანზე გააძევა და ბორჯღალოსნებს მთელი თამაშის წარმართვა კაცნაკლულს მოუწიათ.
რიცხობრივი უპირატესობა მალევე აისახა შედეგზეც და 21-ე წუთზე რუმინელებმა ჩვენს ნახევარზე პირველი ლელო დადეს, რომელიც ზუსტად გარდასახეს.
ტაიმი კი თედო აბჟანდაძის საჯარიმო დარტყმით დასრულდა – 13:7.
მეორე ნახევარი სტუმრების საჯარიმოთი გაიხსნა და სხვაობა 3 ქულამდე შეამცირეს. დაახლოებით 5 წუთში კი ბექა გიგაშვილმა ლელოთი გამოიჩინა თავი, რასაც თედო აბჟანდაძის ზუსტად შესრულებული გარდასახვა მოჰყვა.
62-ე წუთზე კვლავ რუმინელების ჯერი დადგა. ბორჯღალონსებმა თავის ნახევარზე მორიგი ლელო მიიღეს. – 20:17.
შეხვედრის დასრულებამდე 10 წუთით ადრე სტადიონზე შეკრებილმა გულშემატკივრებმა საქართველოს ნაკრების მესამე ლელო იხილეს. თავი ამჯერად აკაკი ტაბუცაძემ გამოიჩინა და ბორჯღალოსნებმა მეტოქესთან კომფორტული უპირატესობა მოიპოვეს – 25:17
დარჩენილ დროში ბორჯღალოსნებმა უპირატესობის შენარჩუნება მოახერხეს. თამაშის დასასრულს ილია ბაბუნაშვილმა მეტოქეს არეკნი გაუტანა და საბოლოო ანგარიში, 28:17 დააფიქსირა. ქართველმა მორაგბეებმა საბოლოოდ უმძიმეს ბრძოლაში გაიმარჯვეს და რაგბი ევროპის ჩემპიონატის 2021 წლის სეზონი 4-დან 4 მოგებით დაასრულეს, რაც ბუნებრივია ტურნირის ჩემპიონობასაც ნიშნავს. ამასთან, ბორჯღალოსნები ანთიმოზ ივერიელის თასის გამარჯვებულებიც გახდნენ და 2023 წლის მსოფლიო თასზე თამაშის უფლებაც მოიპოვეს.
