ბექა ღვინიაშვილმა დოჰას მასტერსზე საქართველოს ვერცხლის მედალი მოუპოვა.
90კგ წონით კატეგორიაში ბექა ფინალამდე დამაჯერებლად მიაღწია, სადაც მსოფლიოს მოქმედ ჩემპიონს, ნოელ ვან ტ ენდს შეხვდა და მძიმე ბრძოლაში დამარცხდა.
საქართველოს ნაკრების ერთ-ერთმა ლიდერმა დოჰას მასტერსი Prime Sport-თან შეაფასა.
მასტერსის მედალი ყველა ძიუდოისტისთვის მნიშვნელოვანია, თუმცა ჩემპიონობასან ახლოს ვიყავი და ოდნავ გულდაწყვეტილი ვარ. დოჰას მასტერსამდე კორონავირუსი გადავიტანე და სრულფასოვანი მომზადება ვერ მოვახერხე. ამის ფონზე ვერცხლის მედალიც დადებით შედეგად უნდა შეფასდეს.
ფინალამდე ერთი ამოსუნთქვით მიხვედი? გადამწყვეტ ბრძოლაში რამ შეგიშალა ხელი?
ეს სპორტია. ტურნირს ორი ჩემპიონი ვერ ეყოლება. სამწუხაროდ დღეს ფინალში არ გამიმართლა.
სამომავლო გეგმები როგორია?
წლეულს, მთავარი სპორტული ფორუმი ტოკიოში გველის. ბუნებრივია, მიზანიც ოლიმპიურ თამაშებზე წარმატებული გამოსვლაა. მანამდე კი რამდენიმე გრანდ-სლემია, რომელთაგან განსაკუთრებით მარტის ბოლოს გასამართ თბილისის სლემს გამოვყოფდი. მოხარული ვიქნები თუ ამ შეჯიბრს მოვიგებ.
ავტორი: კახა ბერიძე
