შარშან დაწყებული რეგრესი, წლეულსაც გრძელდება. ნოკოლოზ ბასილაშვილი აგერ უკვე წელიწადია გონს ვერ მოდის და იანვარში ანტალიის 250 ათასიან ტურნირზე ორ უსახელო მეტოქესთან მძიმე გამარჯვებას თუ არ ჩავთვლით ყველგან და ყველასთან აგებს.
ქართული სპორტის და განსაკუთრებით სამეფო სპორტის მოყვარულები კარგად უწყიან თუ რატომ და როდის დაეწყო ბასილაშვილს ფსიქოლოგიური პრობლემები. მას შემდეგ ჩვენებური მეჩოგნის კარიერაში შავი ბურუსი ჩამოწვა და კორტზე საქმეებიც უკან-უკან მისდის.
ნიკოლოზ ბასილაშვილისთვის ავსტრალიის ღია პირველობა უკვე დასრულდა. ერთ ცნობილ ქართულ ფილმში ნათქვამი გამონათქვამისა არ იყოს – ბასილაშვილს მელბურნში გამარჯობის თქმა არ დასცალდა, ტურნირს წლის პირველ დიდ სლემს ისე დაემშვიდობა.
ნიკოლოზ ბასილაშვილი, სასტარტო ეტაპზევე ტომი პაულს დაეჩაგვრინა. ამერიკელმა ჩოგბურთელმა, რომელიც მსოფლიო რეიტინგის 53-ე ნომერია, ბასილაშვილს სამ სეტში – 6:4, 7:6, 6:4 მოუგო.
მოკლედ, ნიკოლოზ ბასილაშვილი კორტზე კვლავ პრობლემებს განიცდის. იმედია, მისი კარიერის ეს შავი ზოლი მალე დასრულდება და ქართველი ჩოგბურთელი ქომაგების გახარებას კვლავ დაიწყებს.
