ATP-მ მსოფლიო რეიტინგის განახლებული სია გამოაქვეყნა, სადაც საქართველოს პირველი ჩოგანი 2 პოზიციით არის დაქვეითებული.
ნიკას ბოლო ტურნირი ტოკიოს ოლიმპიადა იყო. ქართველმა ჩოგბურთელმა 1/8 ფინალამდე მისვლა შეძლო, სადაც საბოლოოდ აწ უკვე მოქმედ ოლიმპიურ ჩემპიონთან, ალექსანდრ ზვერევთან დამარცხდა. შედეგად, ბასილაშვილი რეიტინგში 2 საფეხურით დაქვეითდა და ამ დროისთვის 1498 ქულით 43-ე ადგილს იკავებს. არა და იყო დრო, როდესაც ნიკა მე-16 საფეხურზეც იყო. ეს ქართველი ჩოგბურთელის კარიერაში რეკორდული მაჩვენებელია, რომელსაც მან 2019 წელს მიაღწია.
უახლოესი ტურნირი, რომელშიც საქართველოს საუკეთესო ჩოგბურთელი იასპარეზებს ტორონტოს საერთაშორისო ტურნირი იქნება. ნიკა საწყის შეხვედრაში ამერიკელ ჯენსონ ბრუკსბის დაუპირისპირდება. მატჩი 10 აგვისტოს, თბილისის დროით 19:00 საათიდან დაიწყება.
