მელბურნში ჩასულ ჩოგბურთელებს არაორდინალურ სიტუაციაში მოუწევთ ყოფნა. პრინციპში, პანდემიის გადამკიდე აგერ უკვე წელიწადია მსოფლიო განსხვავებულ რეჟიმში ცხოვრებას შეეჩვია, თუმცა რეგულაციების და სპორტული ბატალიების შერწყმა ახალი გამოწვევაა.
არახალი ამბავია, რომ ავსტრალიის ღია პირველობა სერიოზული კონტროლის დაცვით ჩატარდება და ჩოგბურთელებს მკაცრ კარანტინში ყოფნა მოუწევთ. ურჩებს კი კარგი დღე არ დაადგებათ.
ავსტრალიის მთავრობა, ტურნირის მიმდინარეობის პერიოდში და მანამდე დაწესებულ რეგულაციებს სერიოზულად დაიცავს და ყველას გამადიდებელი ლუპით დააკვირდება. მისი დარღვევის შემთხვევაში სანქციებიც მკაცრი იქნება.
კერძოდ – ვიქტორიის შტატის მაღალჩინოსნების ნებართვის გარეშე, პიროვნების ქალაქიდან-ქალაქში მოგზაურობა ან თუნდაც სასტუმროდან გამოსვლა 20 ათასი ავსტრალიური დოლარით დაჯარიმდება და ასევე მასზე საქმე აღიძვრება.
დიდი სლემის დაწყებამდე, 14 დღიანი სავალდებულო კარანტინის დამრღვევები ტურნირიდან მოიხსნებიან, ჩამოეჭრებათ საპრიზო თანხა, გაუხანგრძლივდებათ საკარანტინე ვადა, სასტუმროს ნომერში გადავლენ სრულ იზოლაციაში და შესაძლოა ქვეყნიდან დეპორტაცია ან უფრო უარეს შემთხვევაში დაპატიმრებაც ელოდეთ.
და კიდევ ერთი – შესაძლოა ჩოგბურთელი იდეალურად იქცეოდეს და ყველა წესს ემორჩილებოდეს, მაგრამ თუ მისი გუნდის რომელიმე წევრს გადაცდომა მოუვა და პირობებს დაარღვევს, პასუხისმგებლობა მაინც სპორტსმენს მოუწევს.
