ევროპის სუპერლიგა იქით იყოს და ამ ზაფხულს ალბათ ცხელი სატრანსფერო ამბები დატრიალდებდა. ბობოლა გრანდები თავიანთი სასურველი ფეხბურთელების ხელში ჩაგდებას აუცილებლად შეეცდებიან.
რა ასაკშიც არ უნდა იყოს, კრიშტიანო რონალდუ მაინც ნებისმიერი გუნდისთვის საჭირო და გამოსადეგი ფორვარდი რომ არის ორი აზრი არ არსებობს. უკვე დაიწყო მითქმა-მოთქმა, რომ პორტუგალიელი სუპერვარსკვლავი „იუვენტუსს“ დატოვებს.
პოპულარული იტალიური გამოცემის La Gazzetta dello Sport-ის ინფორმაციით რონალდუს ტურინში დარჩენისკენ გული აღარ მიუწევს და ისევ პრემიერლიგაში თამაში სურს. ინგლისში კი კრიშტიანოს სახელი უპირველესად „მანჩესტერ იუნაიტედს“ უკავშირდება. ჰოდა, რონალდუსაც სწორედ წითელ ეშმაკებში დაბრუნება მოუწადინებია.
საამისოდ კი პორტუგალიელი შემტევი მზად არის ხელფასიც საგრძნობლად დაიკლოს. ამჟამად, რონალდუს ანაზღაურება „იუვენტუსში“ 31 მილიონ ევროს შეადგენს, „მანჩესტერ იუნაიტედი“ კი ამდენის გადამხდელი არ არის, თუმცა როგორც ამბობენ მინიმუმ 20 მილიონზე ნაკლები არ უნდა იყოსო.
მოკლედ, დაველოდოთ მოვლენების განვითარებას. კრიშტიანო რონალდუსთვის „ოლდ ტრაფორდი“ მშობლიური გარემოა და ალბათ არც მანჩესტერელები იქნებიან უარზე.
