ბოლო პერიოდში თბილისის „დინამომ“ რამდენიმე მნიშვნელოვანი ტრანსფერი განახორციელა. გუნდში, მთავარ მწვრთნელად გიორგი ნემსაძის მოსვლის შემდეგ, ქართული ფეხბურთის ფლაგმანმა რამდენიმე ლეგიონერი დაიმატა. კერძოდ ჰოლანდიელი ფაბიან სპორსკლეიდი, რომელიც ამსტერდამის „აიაქსია“ აკადემიის აღზრდილია და ასევე ორი ფეხბურთელი სერბეთიდან – ფორვარდი ზორან მარუშიჩი და ნახევარმცველი მილან რადინი.
ერთი ხანობა, გავრცელდა ინფორმაცია, რომ „დინამოში“ შესაძლო იყო რამდენიმე ქართველი ლეგიონერიც დაბრუნებულიყო. ყველაზე ხშირად ჯანო ანანიძის სახელი ისმოდა, თუმცა საბოლოოდ ეს ტრანსფერი არ შედგა.
ყველაზე საინტერესო კი მაინც ალი სისოკოს ამბავი იყო. პრემიერლიგა მოვლილი ფეხბურთელი „დინამოსთვის“ მართლაც მნიშვნელოვანი შენაძენი იქნებოდა, თუმცა სისოკომ საქართველოს არაბეთი ამჯობინა.
გადაცემაში „სპორტი იმედზე“, თბილისის „დინამოს“ მთავარმა მწვრთნელმა ამ და სხვა თემებზე საინტერესო კომენტარი გააკეთა და შეიძლება ითქვას, რომ ყველაფერს ნათელი მოჰფინა.
„ნიკა კვეკვესკირთან და ჯანო ანანიძესთან მოლაპარაკებები მართლაც გვქონდა. მე, ორივეს ვესაუბრე, მაგრამ მათ თვალი მაინც უცხოეთისკენ უჭირავთ. ამიტომაც, მოლაპარაკებების გაგრძელებას აზრი აღარ ჰქონდა და ამის იქით აღარ წავსულვართ.
განვიხილავდით გურამ კაშიას საკითხსაც. მისი გამოცდილება აუცილებლად გამოგვადგებოდა. „დინამოში“ დაბრუნების წინააღმდეგი არც ის იყო, თუმცა პირობებზე შეთანხმება ვერ მოხერხდა. ვფიქრობდით კანკავაზეც, თუმცა ჯაბას ფრანგული ვარიანტი გამოუჩნდა და იქ წავიდა.
რაც შეეხება ალი სისოკოს, მასთან მოლაპარაკეკებისას რაღაც ეტაპამდე კი მივედით და მას თურქულ შეკრებაზეც ველოდებოდით, მაგრამ შემდეგ კავშირზე აღარ გამოვიდა. როგორც გავიგეთ, მას შეთავაზებები არაბული გუნდებიდან გამოუჩნდა და იქ წასვლა ამჯობინა“ – განაცხადა გიორგი ნემსაძემ.
